Афганистандын Азык-түлүк жана дары-дармек башкармалыгынын башчысынын милдетин аткаруучу Хамдулла Захид Иранга болгон сапарынын алкагында Ирандын Саламаттык сактоо министрлигинин орун басары жана Азык-түлүк жана дары-дармек уюмунун жетекчиси Мехди Пирсалехи менен жолугушту.
Жолугушуу Афганистандын Ирандагы элчисинин катышуусунда өтүп, анда дары-дармек менен камсыз кылуу, техникалык тажрыйба алмашуу жана эки өлкөнүн фармацевтика жана саламаттыкты сактоо мекемелеринин ортосундагы байланышты чыңдоо жаатындагы эки тараптуу кызматташтыкты кеңейтүү талкууланды.
Тараптар кызматташууну тереңдетүүнүн практикалык жолдорун карап чыгып, бул багыттагы өз ара аракеттенүүнү системалуу түрдө өнүктүрүү зарылдыгын белгилешти.
Жолугушуунун негизги максаты — саламаттык сактоо жана фармацевтика тармагындагы мамилелерди жеңилдетүү жана кеңейтүү экени айтылды.
Белгилей кетсек, буга чейин Афганистандын саламаттык сактоо министринин милдетин аткаруучу Нуржалал Жалали 13-декабрда Ирандын Саламаттык сактоо министрлигинин өкүлдөрү жана Ирандын Кабулдагы элчиси менен жолугуп, дары-дармек, медициналык жабдуулар жана техникалык каражаттар жаатында кызматташууну кеңейтүүгө кызыкдар экенин билдирген.
Бул аракеттер Афганистандын Пакистандан дары-дармек импорттоону жакында эле токтоткон шартында өтүүдө.
Буга чейин Афганистанда колдонулган дары-дармектин 70 пайыздан ашыгы Пакистандан алынып келинсе, чек аралардын жабылышы жана Кабул менен Исламабаддын ортосундагы саясий чыңалуунун күчөшү бул соода жолунун толук токтошуна алып келди.
Мындай кырдаалда Иран аймактагы ири дары-дармек өндүрүүчүлөрдүн бири катары Афганистандын муктаждыктарын камсыз кылууда жана техникалык билимди өткөрүүдө маанилүү ролду ойной алат.
Ошол эле учурда, Нуржалал Жалали бүгүн расмий делегацияны жетектеп Индияга барды. Кабул менен Нью-Делинин ортосундагы саламаттык сактоо боюнча сүйлөшүүлөрдүн негизги темаларынын бири — Афганистанды дары-дармек менен камсыз кылуу маселеси болуп саналат.

















