Бишкекте өткөн АФКнын (Азия футбол конфедерациясынын) Чакырык лигасынын тайпалык этабынын экинчи турунда кыргызстандык «Мурас Юнайтед» клубу Ливандын «Сафа» командасын 2:0 эсебинде жеңип алды.
Оюн Бишкек шаарындагы Дөлөн Өмүрзаков атындагы стадиондо өттү. Кыргызстандык клубдун пайдасына болгон голдорду Ислам Юнусов жана Нурсултан Токтоналиев киргизишти. Бул жыйынтык менен «Мурас Юнайтед» өз тайпасындагы абалын бекемдеп, алдыдагы оюндарга ишенимдүү кадам таштады.
Анткени 25-октябрдагы тажикстандык Регар-ТадАЗ клубу менен өткөн оюнда тең чыккандыктан, азыр тайпада 4 упай менен биринчи орунга жайгашты. Эми алдыда 31-октябрда кувейттик Аль-Араби клубу менен беттешет.
Аталган команда быйыл АФКнын клубдар үчүн жаңы форматтагы мелдешине — AFC Challenge League турниринде дебют жасап жатат. Бул лига континенттин өнүгүп келе жаткан өлкөлөрүндөгү чемпиондор үчүн уюштурулуп, кыргыз футболунун эл аралык деңгээлдеги катышуусун кеңейтүүдө маанилүү роль ойнойт.
Ошол эле учурда дагы бир кыргыз клубу — «Абдыш-Ата» да ушул турнирдин тайпалык баскычында күч сынашууда. 28-октябрда команда Бутандын борбору Тхимпху шаарындагы «Чанглимитанг» стадионунда Омандын «Аль-Шабаб» клубуна каршы ойноп, 1:2 эсебинде жеңилүү ызасын тартты.
«Абдыш-Ата» бул мелдешке 2024-жылкы Кыргызстандын чемпиону катары катышып жатат. Клуб «А» тайпасында Түркмөнстандын «Алтын-Асыр», Омандын «Аль-Шабаб» жана Бутандын «Паро» клубдары менен бирге оюн өткөрүүдө. Алгачкы беттеште «Абдыш-Ата» түркмөнстандык командага 0:1 эсебинде жеңилген болчу. Эми 31-октябрда бутандык «Паро» клубуна каршы акыркы тайпа оюнун өткөрөт.
AFC Challenge League — Азия континентиндеги клубдар үчүн үчүнчү даражадагы мелдеш болуп саналат. Ал Азиядагы өнүгүп жаткан футбол өлкөлөрүнө эл аралык тажрыйба топтоого жана атаандаштык деңгээлин көтөрүүгө шарт түзөт.



















