5-октябрь – Ош шаарынын күнү. Бул дата – калаанын 3025 жылдык мааракесин белгилөөгө негиз болуп берет. Шаар күнүн өткөрүүнүн алкагында, мамлекеттик ишмер Алымбек датканын 225 жылдыгы да кошо белгиленет.
Муниципалитеттин маалыматына ылайык, бул датаны майрамдоого президент Садыр Жапаров катышып, бир катар ачылыштар болоору күтүлүүдө.
Бул күнү алгач С.Ибраимов атындагы Ош улуттук драма театрында “Түштүк-ЭКСПО-2025” эл аралык форуму өткөрүлөт.
Ал эми Алымбек Датка этно-комплексинде “Тарыхый Ош шаары” аттуу эл аралык сүрөтчүлөр кароо-сынагынын жеңүүчүлөрү сыйланып, алардын эмгектеринен турган көргөзмө ачылат.
Ошондой эле шаар тургундарын жана конокторду ар түрдүү маданий жана спорттук иш-чаралар күтөт: атап айтканда, Т.Сатылганов жана А. Навои эс алуу бактарында аркан тартыш, дартс, тогуз коргоол, кол күрөш, шахмат боюнча мелдештер өтөт. “Алымбек-Датка” этнографиялык борборунда улуттук күрөш боюнча таймаштар болот.
“Газпром” ден соолукту чыңдоо борборунда Өзбекстан, Казакстан жана Кыргызстандын бардык дубандарынан келген өспүрүмдөр арасында дзюдо боюнча эл аралык ачык турнир старт алат.
Алишер Навои сейил багындагы амфитеатрда С. Бекмуратов атындагы балдар музыкалык мектеби жана П.И. Чайковский атындагы искусство мектебинин концерттик программасы тартууланат. Төлөйкөн айылындагы ат майданда жаштар арасында көк бөрү боюнча ачык чемпионат жана ат чабыш мелдеши уюштурулат.
Ал эми кечкисин А.Сүйүмбаев атындагы борбордук стадиондо белгилүү эстрада жылдыздары катышкан чоң гала-концерт өтүп, майрамдык кечени жыйынтыктайт.



















