Дүйшөмбү күнү Кытайдын түндүгүндө Шанхай кызматташтык уюмунун (ШКУ) 25-саммити ачылды. Кытай Эл Республикасынын төрагасы Си Цзиньпин ачылыш аземинде куттуктоо сөзүн сүйлөдү.
Мамлекет башчылары расмий билдирүүлөрүн жасоодон мурда, уюмга мүчө болгон он өлкөнүн лидерлери Тяньцзинде биргелешип «үй-бүлөлүк сүрөткө» түштү.
Саммиттин жыйынтыгында Тяньцзинь декларациясы, 10 жылдык стратегия, ошондой эле коопсуздук, соода, энергетика жана маданий кызматташтык боюнча акыркы документтерге кол коюлушу күтүлүүдө.
Ошондой эле саммитте Экинчи дүйнөлүк согуштун аяктаганынын 80 жылдыгына жана БУУнун негизделишине арналган билдирүүлөр кабыл алынат.
ШКУ башында Кытай, Россия, Казакстан, Кыргызстан жана Тажикстандан турган «Шанхай бештиги» механизминин негизинде пайда болгон. Кийин ага алтынчы мүчө катары Өзбекстан кошулган. Бүгүнкү күндө уюмга 10 мамлекет мүчө, 2 байкоочу жана Азия, Европа жана Африканын 14 диалог боюнча өнөктөшү кирет.
Уюм дүйнөнүн болжол менен 24% аймагын жана 42% калкын камтыйт. Мүчө мамлекеттер дүйнөлүк ИДПнын болжол менен төрттөн бир бөлүгүн түзөт. Соода жүгүртүүсү акыркы жыйырма жылда 100 эсеге жакын өскөн.
Кытайдын ШКУга мүчөлөр, байкоочулар жана диалог өнөктөштөрү менен соода жүгүртүүсү 2024-жылы рекорддук 890 миллиард АКШ долларына жеткен. Бул өлкөнүн жалпы тышкы соода көлөмүнүн 14,4% түзгөн.
ШКУнун мурунку саммити 2024-жылдын июль айында Казакстанда өткөн. Анда энергетика, коопсуздук, финансы жана маалыматтык коопсуздук тармактарында 25 стратегиялык документ кабыл алынган.

















