23-июль, шаршемби күнү, Ирандын Тегеран провинциясында аба ырайынын өзгөчө ысыгына байланыштуу электр энергиясы менен сууну үнөмдөө максатында расмий түрдө эс алуу күнү деп жарыяланды. Бул тууралуу Иран Ислам Республикасынын өкмөтүнүн расмий өкүлү Фатеме Мохаджерани социалдык тармактагы X баракчасында жазды.
Анын айтымында, коопсуздук чараларын сактоо жана ресурстарды үнөмдөө менен бул чечим аймак тургундарына эс алып, үй-бүлөсү менен убакыт өткөрүүгө же кыска сапарга чыгууга мүмкүнчүлүк берет.
AccuWeather порталы маалымдагандай, аптанын башында Тегеранда абанын температурасы +40°Cге жетет. Аба ырайы өтө ысык болуп, күндүн астында көпкө жүргөндө организмдин сууну жоготуп, ысыктан жабыркоо коркунучу бар.
Ирандын түндүк-чыгыш тарабында жайгашкан жана калктын саны боюнча экинчи чоң шаар болгон Мешхедде дүйшөмбү күнү абанын температурасы +36 градус болору күтүлүүдө, ал эми шейшемби жана шаршемби күндөрү +38 градуска чейин жетет деп божомолдонууда.
Өзгөчө ысык аба ырайы Түштүк Кореяда да байкалууда. Жайдын башынан бери 600дөн ашык киши күндүн ысыгынан жабыркап, ооруканага кайрылган. Тилекке каршы, 5 киши көз жумган. Бул ысык аба ырайы адаттагыдан бир ай эрте башталып, өлкөнүн бардык аймагында уланууда. Күндүн орточо температурасы +35°C түзүүдө.
