3-июлда Азербайжандын Агдам районундагы Хыдырлы айылында Кыргызстандын элинин атынан курулган “Айкөл Манас” орто мектебини ачылды. Салтанаттуу ачылышка өлкөгө расмий иш сапары менен барган Кыргызстандын президенти Садыр Жапаров менен президент Илхам Алиевдер катышышты.
Президенттин маалымат кызматы тараткан билдирүүгө караганда, Агдам районундагы белекке курулган 528 орунга ылайыкталган мектеп өткөн жылдын март айында башталган. Курулуш толугу менен аяктап, объект пайдаланууга даяр. Аянты 2,7 гектарды түзөт.
“Заманбап имарат үч окуу блогун, спорттук жана жыйын залдарын, ашкана, китепкана, физика, химия жана биология лабораторияларын, эки компьютердик классты, ошондой эле бардык керектүү окуу жана административдик жайларды камтыйт.
Тийиштүү аймакта футбол жана волейбол аянтчалары, эс алуу аймактары жана класстан тышкаркы иш-чараларды өткөрүү үчүн инфраструктура салынган”,- деп айтылат маалыматта.
Белгилүү болгондой, иш-чаранын алдында президенттер Хыдырлы айылындагы калыбына келтирүү иштеринин жүрүшү менен таанышып, көчүрүлгөн эки миң адам үчүн курулган үйлөрдү көрүп чыгышып, жаңы жашоочуларга ачкычтарды жеке өздөрү тапшырышты.
Иш чаранын жүрүшүндө Ильхам Алиев Садыр Жапаровго жана бүткүл кыргыз элине Карабахты калыбына келтирүүгө көрсөткөн колдоосу үчүн ыраазычылык билдирди.
Алиев мектепти куруу демилгеси жеке Садыр Жапаровго таандык болгонун, эми бул окуу жай эки өлкөнүн ортосундагы бир туугандыктын бекем символуна айланганын баса белгиледи.
Ал эми Садыр Жапаров “Айкөл Манас” атындагы мектептин ачылышы тарыхый мааниге ээ окуя экенин белгилеп, эки элдин ортосундагы руханий байланыштарды, стратегиялык өнөктөштүктү мындан дагы тереңдетерин баса белгиледи.
Ошол эле учурда, мамлекет башчы Агдам районундагы “Айкөл Манас” мектеби жана Бишкектеги “Гейдар Алиев” атындагы мектеп эки боордош элдин ортосундагы достуктун, өз ара сый-урматтын символу жана ынтымактын көпүрөсү экенин кошумчалады.
Маалымат иретинде кошумчалай кете турган болсок, Азербайжандагы Агдам району “Биринчи Карабах согушу” учурунда 1993-жылы 23-июлда армян куралдуу күчтөрү тарабынан басып алынып, 2020-жылдын 20-ноябрында “Экинчи Карабах согушу” аяктаган келишимдин шарттарына ылайык, өлкө кайра өз көзөмөлүнө алган. Ошол учурдан баштап облус боюнча калыбына келтирүү иштери башталган.
Маалыматтарга ылайык, шаар Армения басып алган жылдары урандыга айланган.
2023-жылдын июль айында президент Илхам Алиев 20-ноябрды Агдам шаарынын күнү деп бекитип, аны жыл сайын белгилөөнү чечкен. Ошентип азери-армян элдеринин ортосундагы жаңжал дээрлик токтогон.
Ушул жылдын март айында эки өлкө тең тынчтык келишимине кол коюуга даяр экендиктерин ырасташкан.
