АКШнын президенти Дональд Трамп Жакынкы Чыгыштагы кагылышууга байланыштуу дагы бир жолу Израилге кайрылды. Ал Иерусалимди Ислам Республикасы — Иранга жасаган чабуулдарын токтотууга чакырды.
Бул тууралуу ал шейшемби күнү, 24-июнда, Truth Social социалдык тармагындагы билдирүүсүндө жазды. Трамп билдирүүсүндө чабуулдарды биринчи кезекте Израиль токтотушу керектигин белгиледи. Болбосо бул олуттуу кесепеттерге алып келиши мүмкүн экенин эскертти.
«Израиль, бомба ыргытпагыла! Эгер бул кадамга барсаңар, бул чоң мыйзам бузуунун белгиси болот. Учкучтарыңарды дароо үйүнө кайтарып келгиле!» — деп кайрылды Трамп.
Мурда маалымдалгандай, АКШнын президенти Дональд Трамп 24-июнда эртең менен Иран менен Израилдин ортосунда ок атышпоо келишими күчүнө киргенин жарыялаган.
Көп өтпөй Израилдин премьер-министри Биньямин Нетаньяхунун кеңсеси Израил АКШнын президенти Дональд Трамптын Иран менен эки тараптуу ок атышпоо демилгесин кабыл алганын жарыялаган.
Бирок ошол эле күнү Аракчи учурда ок атышууну токтотуу же согуштук аракеттерди токтотуу боюнча “макулдашуу” жок экенин, бирок Израил режими Иран элине каршы мыйзамсыз агрессиясын Тегеран убактысы боюнча таңкы саат төрттөн кечиктирбестен токтотсо, Ирандын андан кийин жооп кайтарууну улантуу ниети жок экенин билдирген болчу.
Иран менен Израилдин ортосундагы жаңжал 13-июнга караган түнү курчуган. Анда Израил Ирандын аймагына кол салып, өлкөнүн аскердик объекттери бутага алынган. Ага жооп катары Ислам Республикасы жөөт мамлекетинин аймагына сокку урган. Ошондон бери тараптар бири-бирине чабуул коюп келишти.
