Орусия учкучсуз учактар тармагында жакшы тажрыйбага ээ жана куралдуу күчтөрдүн өзүнчө бир бутагы катары учкучсуз системалардын күчтөрүн түзүп жатат.
Бул тууралуу президент Владимир Путин 2027-2036-жылдарга мамлекеттик куралдануу программасынын долбоору боюнча жыйында билдиргенин vedomosti.ru агенттиги жазды.
Анын айтымында, мындай аскерлерди тез жана сапаттуу даярдап, системаны ырааттуу өнүктүрүү зарыл.
“Биз армиянын бул бутагын түзүү үчүн көп тажрыйба топтодук”, – деди президент.
Ал ошодой эле кеп өздүк курамды даярдоо, аскерлердин күжүрмөн даярдыгын жогорулатууга жөндөмдүү заманбап техниканы өндүрүү жана жеткирүү жөнүндө болуп жаткандыгын жана жаңы мамлекеттик программа абадан коргонуунун универсалдуу системасын түзүүнү камсыз кылышы керек экендигин баса белгиледи.
Буга чейин Орусияда учкучсуз учактардын системадагы аскерлер үчүн биринчи аскердик окуу жайын түзүү демилгеси тууралуу маалымат чыгып, тиешелүү пландар учурда Коргоо министрлигинде талкууланып жаткандыгы айтылган.
Ал эми Орусиянын президенти Владимир Путин учкучсуз учуучу аппараттар тармагын орус армиясы үчүн негизги тармактардын бири деп атаган.



















