Атомдук энергия боюнча эл аралык агенттиктин (МАГАТЭ) башкы директору Рафаэль Гросси Ирандын расмий өкүлдөрү менен бир катар жолугушууларды жана сүйлөшүүлөрдү жүргүзүү үчүн Тегеранга келгенин Ирандын “ISNA” мамлекеттик маалымат агенттиги билдирди.
“МАГАТЭнин башкы директору Тегеранга техникалык делегациянын башында ирандык расмий өкүлдөр менен жолугушуу үчүн келди”, — деп айтылат маалыматта.
МАГАТЭнин башкы директорунун Иранга жасаган мурунку сапары 2024-жылдын ноябрында болгон. Жаңы сапарынын алкагында Гроссинин Ирандын тышкы иштер министри Аббас Аракчи жана Ирандын Атомдук энергия боюнча уюмунун башчысы Мохаммад Эслами менен жолугушуусу күтүлүүдө.
Ирандын Тышкы иштер министринин орун басары Казем Гариб-Абадинин айтымында, сапар Иран менен агенттиктин ортосундагы үзгүлтүксүз кызматташтыктын алкагында болот.
Ирандын МАГАТЭдеги туруктуу өкүлү Реза Наджафи Гроссинин сапары “кызматташтыкты бекемдөөгө кызмат кылат” деген үмүтүн билдирди жана агенттик Ирандын тынчтык максаттагы өзөктүк программасы боюнча “көз карандысыз жана объективдүү роль ойношу керек” деп баса белгиледи.
МАГАТЭнин жетекчисинин сапары Омандын ортомчулугу менен Иран менен АКШнын ортосундагы кыйыр сүйлөшүүлөрдүн фонунда өтүп жатат. Сүйлөшүүлөрдүн биринчи айлампасы 12-апрелде Маскат шаарында болуп, анда катышуучулардын айтымында, жолугушуу конструктивдүү жана тынч маанайда өттү. Ирандын Тышкы иштер министрлиги тараткан билдирүүгө ылайык, экинчи айлампасы 19-апрелде Оманда өткөрүлөт.
Өзөктүк келишим – 2015-жылы Иран менен АКШ, Франция, Германия, Улуу Британия, Кытай, Россия өзөктүк келишимге кол коюшкан. Ага ылайык, Тегеран уран байытууну чектеп, буга жооп катары Иранга киргизилген экономикалык санкциялар алына баштаган. Бирок 2018-жылдын май айында Дональд Трамп президент болуп турганда АКШ келишиминен чыгып, Тегеранга каршы санкцияларды калыбына келтирген. Буга жооп катары Иран келишим боюнча милдеттенмелерин этап-этабы менен кыскартканын жарыялаган.
