Татарстан Республикасынын (Россия Федерациясы) Казань ашары менен Исфахан (Иран) боордош шаар мамилелерин түзүштү. Келишимге Исфахандагы ЮНЕСКОнун Дүйнөлүк мурастар тизмесине кирген “Чехел Сотун” сарайында шаарлардын мэрлери Илсур Метшин жана Али Касемзаде кол коюшканын “Mehr” агенттиги жазды.
“Тараптар түрдүү багыттар боюнча кызматташууну өнүктүрүү, бири-биринин экономикалык, өнөр жай жана соода потенциалы менен таанышуу, шаарларды өнүктүрүү, экология жана жашылдандыруу боюнча алдыңкы тажрыйбаларды алмашуу боюнча макулдашышты. Өзүнчө пункт маданият тармагындагы кызматташууга берилди”, — деп айтылат маалыматта.
Тараптар Казань жана Исфахан шаарларында жашаган элдердин тарыхы, маданияты жана үрп-адаттары менен таанышууга багытталган чыгармачыл топторду алмашуу, маданий жумалыктарды, сүрөт көргөзмөлөрүн жана башка иш-чараларды өткөрүү пландалууда. Бул кызматташтыктын бардык багыттары эки шаардын тургундарынын жашоо сапатын жакшыртуу үчүн маанилүү, деп айтылат келишимде.
“Бизди Улуу Жибек жолу байланыштырып турат, биздин ата-бабаларыбыз жигердүү кызматташкан. Мамилелерибиздин жаңы барагын ачуу мен үчүн чоң сыймык, ал ийгиликтүү, гүлдөп, шаарларыбызга жаңы өнүгүү тартууласын”, — деди Метшин.
Исфахан шаарынын мэри Али Касемзаде өз кезегинде Казан Россиянын маанилүү экономикалык, саясий жана маданий борбору экенин белгиледи. Ал Исфаханда авиа куруучу завод бар экенин эске салып, бул багытта Казань менен кызматташууну өнүктүрүүгө үмүттөнөрүн билдирди.
«Россия биздин стратегиялык өнөктөшүбүз экенин эске алуу менен, бизде жемиштүү жана натыйжалуу кызматташуу болоруна ишенем», – деп жыйынтыктады ал.
Исфахан — Ирандын борбордук бөлүгүндөгү шаар, ушул эле аталыштагы провинциянын административдик борбору. Тегерандан 340 чакырым алыстыкта жайгашкан. Исфахан Ирандын маанилүү маданий жана тарыхый борбору болуп саналат, XI-XIX кылымдардагы ислам архитектурасынын эстеликтери бар, алардын айрымдары ЮНЕСКОнун Дүйнөлүк мурастар тизмесине киргизилген. Көпчүлүк ирандыктар Исфаханды “несф-е жахон” – дүйнөнүн жарымы деп аташат. Исфаханда тарыхый эң кооз жана архитектуралык жактан маанилүү имараттар бүгүнкү күнгө чейин жакшы сакталып калган.
Заманбап шаар чыгыш архитектурасы менен белгилүү. Көптөгөн кооз жерлер борбордук Имам Хомейни аянтында жайгашкан. Исфахандын эң белгилүү символу Шах мечити, ал 1611-жылы курулган, мозаика менен кооздолгон мечит. Бул шаар байыркы мечиттер, сарайлар, тарыхый базар менен курчалган дүйнөгө белгилүү “Накш-е жахан” аянтын жана тарыхый “Сио-се-Поль” көпүрөсү менен да белгилүү.


















