Казакстандын президенти Касым-Жомарт Токаев Евробиримдиктин тышкы иштер жана коопсуздук саясаты боюнча жогорку өкүлү Кая Калласты кабыл алды.
Бул тууралуу президенттин басма сөз кызматы билдирди.
Расмий маалыматка караганда, сүйлөшүүлөрдүн жүрүшүндө Казакстан менен Евробиримдиктин ортосундагы ар тараптуу кызматташуунун келечеги талкууланды.
Сүйлөшүүнүн жүрүшүндө Каллас Казакстан региондогу биринчи мамлекет болуп, ЕБ менен кеңейтилген өнөктөштүк жана кызматташтык жөнүндө келишимге кол койгонун, бул эки тараптуу мамилелердин жогорку деңгээлде өнүгүп жаткандыгынын ырастоосу экенин белгиледи.
Ал ошол эле учурда казакстандык жарандарга европалык визаларды берүүнүн жол-жобосун жөнөкөйлөтүү боюнча келишим түзүү процедурасынын башталышы тууралуу айтты.
Геосаясий контекстте европалык дипломатиянын башчысы көп тараптуу эл аралык эрежелерге негизделген тартипке чакырыктарды жана коркунучтарды белгиледи.
Ал эми президент Токаев өсүп жаткан глобалдык туруксуздукту эске алуу менен дүйнөдө болуп жаткан татаал окуяларга баа берүүдө токтоолукту жана жоопкерчиликти көрсөтүүнүн өзгөчө маанилүүлүгүн белгиледи.
Президенттин айтымында, Казакстан бардык курч эл аралык проблемаларды жана конфликттерди дипломатиялык сүйлөшүүлөр аркылуу чечүү позициясын ырааттуу карманып келет.
Эки тараптуу жолугушууда Борбор Азия – Евробиримдик форматындагы кызматташуу маселелери да талкууланды.
Евробиримдиктин Жогорку өкүлүнүн айтымында, Борбор Азия өзүнүн ресурстары жана аймактык туруктуулук үчүн географиялык мааниси боюнча гана эмес, инвестициялык потенциалы жагынан да чоң мааниге ээ.
Эскерте кетсек, Евробиримдиктин тышкы иштер жана коопсуздук саясаты боюнча Жогорку өкүлү, Еврокомиссиянын вице-президенти Кая Каллас 27-мартта Түркмөнстандын Ашхабад шаарында Өзбекстан, Кыргызстан, Тажикстан, Түркмөнстан жана Казакстандын катышуусунда өткөн Евробиримдик-Борбор Азия министрлеринин 20-жыйынына катышкан.



















