Сауд Аравияда мыйзамсыз жүргөн өзбекстандык жарандар чет өлкөгө туристтик виза менен чыгып, бирок өлкөдө иш издеп жүрүшкөн. Алар 12-14-март күндөрү Сауд Аравиянын укук коргоо кызматкерлери тарабынан кармалган.
Газета.uz агенттигинин маалыматына караганда, Өзбекстандын элчилиги Сауд Аравиянын компетенттүү органдары менен жүргүзгөн сүйлөшүүлөрүнүн жыйынтыгында кармалгандардын бардыгы үй-бүлөлөрүнө кайтып келе алышкан.
«Кармоонун негизги себеби – жергиликтүү мыйзамдарды жана белгиленген жүрүм-турум эрежелерин сактабагандыгы», -деп айтылат маалыматта.
Сауд Аравиясына туристтик виза менен келгендердин көбү өлкөдө жумушка орношуу максатында уруксатсыз калган.
Кармалгандардын арасында 20 жашка чыга электер да бар.
Жаштардын айрымдары жакындарына билдирбестен сапарга чыгып кетип, үй-бүлөлөрдүн тынчын алган жана аларды активдүү издөө иштери жүргөн.
Өзбекстандын элчилиги чет өлкөгө барууну пландап жаткан бардык жарандарын келген өлкөнүн мыйзамдарын алдын ала үйрөнүүгө, жергиликтүү салттарды жана нормаларды сыйлоого, мыйзамдуу түрдө келүү жана жумушка орношуу үчүн бардык керектүү документтерди даярдоого чакырат.
«Мындан тышкары, биз ар кандай кырдаалдарда баарлашуу үчүн кабыл алуучу өлкөнүн тилинин негиздерин үйрөнүүнү сунуштайбыз. Сауд Аравиясында оор кырдаалга туш болсоңуз, Эр-Рияддагы элчиликке же Жиддадагы Башкы консулдукка кайрылсаңыз болот», — деп айтылат билдирүүдө.
















