Кыргызстандын Тышкы иштер министри Жээнбек Кулубаев 11-12-февраль күндөрү эки тараптуу мамилелердин тарыхында биринчи жолу расмий сапар менен Оман Султанатына барат.
Бул тууралуу Кыргызстандын Тышкы иштер министрлигинин басма сөз кызматы билдирди.
“Сапар Оман Султанатынын тышкы иштер министри Саид Альбусаидинин чакыруусу боюнча уюштурулууда”, – деп айтылат билдирүүдө.
Сапардын алкагында эки мамлекеттин тышкы саясат ведомстволорунун жетекчилеринин жолугушуусу пландалууда. Анда Кыргыз-Оман кызматташтыгынын актуалдуу маселелери, соода-экономикалык жана инвестициялык байланыштарды өнүктүрүү жана эл аралык уюмдардын алкагындагы кызматташтык талкууланары күтүлүүдө.
Министр Кулубаев Оман жетекчилиги жана мамлекеттик мекемелердин өкүлдөрү менен да жолугушууларды өткөрөт.
Кыргызстан менен Оман дипломатиялык мамилелерди 1992-жылдын май айында түзгөн.
Эске салсак, 2025-жылдын 4-январынан тартып Кыргызстан туристтик агымдарды андан ары стимулдаштырууга жана Кыргыз Республикасынын инвестициялык жана ишкердик жагымдуулугун жакшыртуу максатында Омандын, Сауд Аравиянын, БАЭ, Катар, Кувейт жана Бахрейндин жарандары үчүн визасыз режимин киргизген.
Аталган өлкөлөрдүн туристтик максаттары менен келген жарандары Кыргыз Республикасынын аймагында 360-күндүк мөөнөттүн ичинде 180-күндүк мөөнөттө уруксат берүүчү документтерди алуусуз жүрүү укугуна ээ болушат. Башка максаттар менен кирген учурда визиттин тиешелүү максаттарына (мисалы: эмгек ишмердигин жүргүзүү, окуу) визаларды тариздөө талап кылынарын белгилей кетүү керек.


















