Түркмөнстан Ооганстанга экономикалык, саясий жана дипломатиялык колдоо көрсөтүүнү улантат.
Бул тууралуу Түркмөнстандын Элдик Кеңешинин төрагасы Гурбангулы Бердымухамедов түркмөн-ооган чек арасындагы энергетика, транспорт, коммуникация жана логистикалык инфраструктура объектилерин ачуу жана ишке киргизүү аземинде билдирди.
«Ооган боордошторубузду жана шериктештерибизди Түркмөнстан мындан ары да коңшу өлкөгө ар тараптуу, анын ичинде экономикалык, саясий жана дипломатиялык, өзгөчө эл аралык аренада колдоо көрсөтөт деп ишендиргим келет», – деген анын сөзүн расмий «Нейтральный Туркменистан» гезити келтирди.
Иш-чаранын жүрүшүндө Бердымухамедов атындагы камкордукка муктаж балдарга жардам көрсөтүү фондунун эсебинен Ооганстанга гуманитардык жардам жөнөтүлдү. Ал балдар тамак-ашын, буудай, тамак-аш жана өнөр жай продукциясын, күйүүчү майды камтыйт.
Жалпысынан жети объект ачылды. Мары велаятында Түркмөнстан-Ооганстан-Пакистан-Индия газ куурунун Серхетабат-Герат участогунун, була-оптикалык байланыш линиясынын жана Атлык-1 (Шатлык-1) газ компрессордук станциясынын пайдубалын түптөө, Тургунди-Герат темир жолунун биринчи участогу жана Тургунди темир жол станциясынын кургак портунда кампа комплексинин курулушун баштоо аземи болуп өттү.
Ошондой эле узундугу 177 метр болгон темир жол көпүрөсү да пайдаланууга берилип, Ооганстандын Гератында Түркмөнстан-Ооганстан-Пакистан багыты боюнча электр өткөргүч линиясынын долбоорунун алкагында Nur-el-Jаhad электр станциясы ишке киргизилди.
Бердымухамедовдун айтымында, эсептөөлөргө ылайык, ооган эли кеминде 12 миң жумуш орду менен камсыз болот, ал эми өлкөнүн өзүнө жылына орто эсеп менен 1 миллиард доллардан ашык киреше түшөт. Бул бир гана эки тараптуу мамилелердин динамикасына гана эмес ошондой эле региондун динамикасына оң таасирин тийгизет.
















