Ирандын Евразия экономикалык биримдигине (ЕАЭБ) кирген өлкөлөргө экспорту 138% өстү.
Бул тууралуу Ирандын сооданы өнүктүрүү уюмунун (TPOI) жетекчиси, өнөр жай министринин орун басары Мехди Зейгами билдирди.
Ал Иран-ЕАЭБ бизнес-форумуна 300 ирандык компаниянын катышарына токтолуп, биримдиктин мамлекеттери менен соода жүгүртүүнүн масштабынын өсүшүнө 2019-жылы Иран менен ЕАЭБ ортосунда эркин соода аймагын түзүү боюнча убактылуу келишимдин ишке ашырылышы чоң өбөлгө түзгөнүн белгиледи.
Анын айтымында, Иран менен Биримдикке мүчө өлкөлөрдүн ортосундагы бизнес жана экономикалык кызматташтыкты бекемдөө жана андан ары кеңейтүү бизнес форумдун негизги максаты болуп саналат.
Иран-ЕАЭБ бизнес форуму III Евразиялык экономикалык форумдун алкагында 30-31-сентябрда Арменияда өтөт.
Анын катышуучуларынын арасында 300дөн ашуун ирандык, ошондой эле Россия, Армения, Беларусь, Казакстан жана Кыргызстан сыяктуу ЕАЭБге мүчө беш өлкөнүн компаниялары бар.
Алдыда боло турган бизнес диалогдун чоо-жайын Евразия экономикалык комиссиясынын соода министри Андрей Слепнев менен Иран Ислам Республикасынын Россиядагы элчиси Казем Жалали да талкуулаган.
Тараптар бизнес-диалог Форумдун негизги иш-чараларынын бири болуп, Биримдик өлкөлөрүнүн бизнеси менен ирандык компаниялардын ортосундагы соода-экономикалык байланыштарды тереңдетүү үчүн мүмкүнчүлүктөрдү ачып берерине ишеним билдиришкен.
Буга чейин Иран Евразия экономикалык биримдигинде (ЕАЭБ) байкоочу мамлекет статусун алууга кызыкдар экени маалымдалган. Евразия экономикалык комиссиясынын (ЕЭК) штаб-квартирасы Тегерандын өтүнүчүн карап чыкты.
Чет өлкөлүк өнөктөшкө мындай статусту берүү чечими биримдикке мүчө болгон мамлекет башчылары тарабынан Жогорку Евразиялык экономикалык кеңештин жыйынында кабыл алынат.
















