Жогорку Кеңештин төрагасы Нурланбек Шакиев Россия Федерациясынын Санкт-Петербург шаарында уюштурулган Көз карандысыз мамлекеттер шериктештигине мүчө-өлкөлөрдүн Парламенттер аралык ассамблеясынын (КМШ ПАА) кеңешинин жыйынына катышты.
Парламенттин басма сөз кызматынан билдиришкендей, жыйында төрага Жогорку Кеңештин демилгеси менен жыл сайын Чолпон-Ата шаарында өткөрүлүп келе жаткан “Шериктештиктин балдары” IX Эл аралык маданий-билим берүү форумунун жыйынтыгы тууралуу баяндама жасады.
“Салтка айланган бул иш-чара шериктештикке кирген өлкөлөрдөгү келечек ээлеринин достугун бекемдеп, ынтымагын арттырууда. Ошондой эле аталган форум жаштар арасында тажрыйба алмашууга жана КМШга мүчө-мамлекеттердин элдеринин каада-салттары менен таанышууга өбөлгө түзөт. Андыктан жаштар арасында биримдикти чыңдап, мамлекеттер аралык байланышты кеңейтүүдө аталган форумдун мааниси өтө чоң”, – деди ал.
Андан тышкары, форумду мындан ары да улантуу зарылчылыгына токтолгон төрага демилгени колдогон КМШга мүчө-мамлекеттердин парламент жетекчилерине ыраазычылык билдирди.
Эскерте кетсек, “Шериктештиктин балдары” форуму 2013-жылдан бери өткөрүлүп келет.
















