Мындан тышкары электромобилдерди кубаттоо үчүн түнкү тарифтер арзандайт.
Электр унаасы бар Өзбекстандын жарандарына түнкүсүн үйүндө “жашыл” унаасын кубаттоого алуу үчүн электр энергиясына жеңилдетилген тарифтер киргизилет. Бул жаңылык тууралуу өлкө президенти Шавкат Мирзиёев энергетикалык ресурстарды үнөмдүү пайдалануу боюнча жыйында айтканын Фергана сайты билдирди.
Кийинчерээк өкмөт тарифтердин деңгээлин белгилейт. Азырынча электр унааларынын кубаттоочу түзүлүштөрүнө эсептегичтерди орноткон республиканын тургундары жеңилдиктерге ээ болору белгилүү. Жеңилдетилген тарифтер түн ичинде гана колдонулат. Ошондой эле жеке үйлөргө кубаты жети киловаттка чейин болгон кубаттоочу станцияларды колдонууга уруксат берилери айтылды.
Жыйындын жүрүшүндө мамлекет башчысы электромобилдер үчүн кошумча инфраструктураны түзүү боюнча иштер жүрүп жатканын билдирди. Ошентип, көчөлөрдө жана көп кабаттуу үйлөрдүн айланасында кубаттуулугу 22 киловаттка чейин болгон кубаттоочу станциялар пайда болот. Ушундай эле объектилер мамлекеттик мекемелердин унаа токтоочу жайларында, соода борборлорунун, мейманканалардын жана курорттук зоналардын жанында орнотулат.
Жыйында Өзбекстанда экологиялык жактан таза унаалардын саны өсүп жатканы баса белгиленди. Атап айтканда, кийинки уч жылдын ичинде алардын саны он эсеге көбөйүп, 35 миц даанага жетти. Ошол эле учурда Жиззакта электромобилдерди чыгаруу жолго коюлууда, бул өлкөдө транспорттун мындай түрүн андан ары өнүктүрүүгө таасирин тийгизиши керек.
Бир нече жылдан бери Өзбекстан экологиялык абалды жакшыртууга, анын ичинде жарандарды “жашыл” транспортту сатып алууга шыктандырууга багытталган чараларды көрүп келет.
Маселен, 2022-жылдын аягында президенттин жарлыгы чыккан, ага ылайык 2025-жылга чейин республикада электромобилдерди кубаттоочу станциялардын санын кеминде 2500 бирдикке чейин көбөйтүү керек. Ошону менен катар мамлекеттик ишканалардын жетекчилерин жана аткаминерлерин экологиялык жактан таза унааларга өткөрүү чечими кабыл алынды.


















