Япониянын Исикава префектурасында болгон катуу жер титирөөнүн курмандыктарынын саны 13 адамга жеткенин “Киодо” агенттиги дарыгерлерге таянуу менен билдирди.
Буга чейин сегиз киши каза болгону айтылган. Жабыркагандардын саны ондоп саналат.
“Ното жарым аралында жер титирөөнүн курмандыктарынын жалпы саны он үчкө жетти”, — деп айтылат билдирүүдө.
Исикава префектурасынын Вадзима шаарында 50дөн ашуун имарат урап, ошондой эле жер титирөөдөн кийин чыккан ири өрттүн кесепетинен 100дөн ашуун имарат жарым-жартылай же толугу менен күйүп кетти.
Жер титирөөнүн кесепеттерин жоюуга жардам берүү үчүн аймакка өлкөнүн коргоо күчтөрү жөнөтүлгөн.
Япониянын батышындагы бир нече жер титирөө дүйшөмбү күнү катталды. Аларга “Ното жарым аралындагы жер титирөө” деген ат берилди. Күчү 5,7 баллга жеткен биринчи жер титирөө жергиликтүү убакыт боюнча саат 16:06да (Москва убактысы боюнча 10:06) катталды, эң күчтүүсү 7,6 баллга жеткен жер силкинүү төрт мүнөттөн кийин, дагы сегиз мүнөттөн кийин күчү 6,1 баллдык жер титирөө катталды.
Исикава жана Ниигата префектураларында эки сааттын ичинде жалпысынан 29 жер титирөө катталды. Зилзала Осака, Киото жана Токиодо да сезилди.
Япониянын метеорологиялык агенттиги бул кырсык 1985-жылдан берки жарым арал аймагында эң күчтүү жер силкинүү экендигин белгиледи. Хоккайдодон Кюсюге чейинки батыш жээктерде цунами коркунучу жарыяланды.


















