![]()
Укук коргоо органынын кызматкерлери Ташкенттин Сергелий районундагы “Эркин” жол-көзөмөл бекетинде автомашинаны текшерүү учурунда 9000 жасалма АКШ долларын табышып, жүгүртүүгө киргизүүдөн кармап калышкан. Бул тууралуу Өзбекстандын Башкы прокуратурасына караштуу Экономикалык кылмыштарга каршы күрөшүү департаментинин пресс-кызматы билдирди.
Анда өзбек укук коргоо кызматкерлери А. Ж. аттуу жаран башкарган Lacetti автомашинасын текшерүүдө 89 даана 100 долларлык купюра табылган. Департаменттин маалыматы боюнча, шектүү адам бул жасалма долларды Ташкентте жүгүртүүгө чыгарууну пландаштырган.
А. Ж.га карата Кылмыш кодексинин 176-беренесине (жасалма акчаны, акциздик маркаларды же баалуу кагаздарды даярдоо, сатуу) ылайык кылмыш иши козголду.
Мындан мурда өзбек маалымат каражаттары Ташкенттин Чилинзар районунда 20 миң жасалма долларды сатуу аракетин көргөн учурда бир нече адам кармалгандыгын жазышкан.
Белгилей кетүүчү жагдай, үстүбүздөгү жылдын 4-декабрында Кыргызстандын УКМКсы тарабынан Бишкек шаарында трансулуттук кылмыштуу топтун мүчөлөрү, жасалма акчаларды (Түркияда жасалган АКШ доллары) сатуу менен алектенген кыргыз жарандары Ж.К.А. жана М.К.Т. кармаган.
Кармалган адамдар чет мамлекеттердин (Өзбекстан Республикасы жана Түркия) жарандары менен алдын ала сүйлөшүп, КР жана Өзбекстан Республикасынын аймагында жасалма акча каражаттарын алып сатууну жана жүргүртүүнү ишке ашырышкан.
Учурда Кыргызстандын жана Өзбекстандын аймагында контрафакттык акча каражаттарын өндүрүү жана сатуу менен алектенген адамдардын кеңири чөйрөсүн (Кыргыз Республикасынын, Өзбекстан Республикасынын жана Түркиянын жарандары) аныктоо, алардын мыйзамсыз аракеттерине бөгөт коюу максатында тиешелүү ыкчам-издөө иш-чаралары жүргүзүлүүдө.



















