Жалал-Абад шаарынын мэри Эрнисбек Ормоков Улуу Ата Мекендик согуштун ардагери Сафин Гаффандан кабар алып, 1-октябрь – Эл аралык карылар күнү менен куттуктады.
Шаар мэри кылым жашаган ардагерге ден соолук каалап, жергиликтүү бийликтин атынан белек тапшырып, шаар бийлиги согуш ардагеринин бардык муктаждыктарын чечип, ар тараптуу жардам берүүсүн улана турганын белгиледи.
Жергиликтүү бийлик бүгүн калаадагы жалгыз бой, аз камсыз болгон карыялардан кабар алып, майрамдык белектерди тартуулады. Жалал-Абад шаарында пенсия курагындагы 9426 жаран бар.
1-октябрь – Эл аралык карылар күнүнө карата Кыргызстанда түрдүү социалдык иш чаралар өткөрүлүүдө.
Кошумчалай кетсек, 1-октябрды карылар күнү катары белгилөө үчүн 1990-жылы БУУнун Баш катчылыгы расмий майрамдардын катарына киргизген.
Бул күндү белгилөөнүн максаты – дүйнө коомчулугунун улгайган адамдардын көйгөйлөрүнө жана алар муктаж болгон нерселерге көңүлүн бурдуруу, карыялардын коомчулукка керек экендигин түшүндүрүү аркылуу аларга колдоо көрсөтүү болуп саналат.
Алгач бул датаны Европада, андан соң Америкада, ал эми 1990-жылдын аягында бүт дүйнө белгилей баштаган. 1-октябрь күнү көптөгөн өлкөлөрдө түрдүү фестивалдар, майрамдар, акциялар жүрөт. Мунун баары улгайган адамдардын укуктарын коргоо, аларга көмөк көрсөтүү үчүн жасалат. Өкмөттүк эмес уюмдар ар кандай кайрымдуулук иш-чараларын өткөрүп, радио жана теле берүүлөрдө карылардын көйгөйлөрүн чагылдырышат.
