Быйыл, 2023-жыл үчүн Жалал-Абад шаарына Республикалык бюджеттен 2 миллиард сом бөлүнгөнү маалым. Бул каражатка калаа бийлиги 13 ири долбоорлорду ишке ашырууга бел байлап турат.
Алар толугу менен ишке кирип калса, шаардын тротуарларынан тартып, ири инфротүзүмдөрүнө чейин бир катар багыттар боюнча өнүгүүсү алдыга жылат деп күтүлүүдө. Тактап айтканда, кинотеатр, курортко чейин тротуар, асфальт чыгаруучу, таштандыны кайра иштетүүчү заводдор, жаш балдар үчүн оюн-зоок аянтчасы салынаары пландалууда.
Андан сырткары иш орундар да түзүлмөк. Бул каражатка аткарыла турган жумуштар тууралуу сурап, Жалал-Абад шаарынын мэри Эрнисбек Ормоковго микрофон сурдук.
– Эрнисбек мырза саламатсызбы? Жалал-Абад шаарын өнүктүрүү үчүн 2 млрд сом бөлүнгөнү маалым. Ага сиздер 13 ири долбоор баштаганы жатыпсыздар. Жумуш качан башталат?
– КР мыйзам талаптарына ылайык, бул сумманын баарын тендерге беребиз. Ал жерде биздин берген параметрлерге туура келсе, утуп алган адамды аныктап туруп ошол боюнча иш алып барылат.
– Бул долбоордун алкагында Жалал-Абад шаарына техникалык суу чыгаруу пландалып атыптыр. Анын зарылчылыгын түшүндүрүп берсеңиз. Эмне шаарда техникалык суу жетишсиз беле?
– Буга чейин техникалык суу жетишсиз болчу. Ичүүчү суу менен камсыздап келгенбиз, жашылдандыруу чарбасы тарабынан көчөттөрдү, бак-дарактарды жашылдандырууда ичүүчү таза суу менен сугарып келгенбиз. Бүгүнкү күндө беш долбоор пландалган. Тактап айтканда, скважиналар казылып, техникалык сууларды шаар ичинде чыгарабыз деп турабыз. Быйылкы жылдагы долбоордо жалпысынан сегиз скважина болот. Былтыр үчөө курулган, быйыл бешөө курулат буйруса. Ушулар менен шаарды техникалык суу менен камсыз кылабыз.
– Андан сырткары, долбоордо аткарылат деген тротуарлар менен веложолдорду салуу тууралуу да кенен айтып берсеңиз.
– Тратуарлар, жолдор боюнча айтсак, Жалал-Абад шаарынын ичиндеги эң негизгиси жолдорду оңдоп түзөөгө ошол чоң көчөлөрдү киргизгенбиз. Бул жерде тротуар, лоток, жарыктандыруу жана автоунаа жүрүүчү жолдордун долбоорлорун даярдап, киргизгенбиз. Ушул менен биргеликте Жалал-Абад санаториясына чыгуучу жол бар. Бирок тротуар жок болгонуна байланыштуу бул жерге вело жана тротуар жолдорду киргизип атабыз. Ал жерге жарыктандыруу болот, таштанды таштоочу урналарды орнотобуз, чарчаганда эс ала турган отургучтарды курабыз деген пландар бар. Анан шаардагы негизги алты көчөнүн боюнда тротуар, лотоктор каралып атат.
– 2 млрд сомду өз мөөнөтүндө толук өздөштүрүп бүтө аласыздарбы? Анткени былтыр шаардагы айрым курулуштар мөөнөтүндө бүткөрүлбөй калгандыгы сиздин жумушка көлөкөсүн түшүрүптүр.
– Былтыр жыл башында берилген иш-пландагы курулуш иштери толук бүттү. Элүү долбоор бар эле. Анын баарын ийгиликтүү акырына чыгардык. Айрым жолдордун сапаты начар болуп калып атпайбы, бирок анын үч жылдык кепилдиги бар. Жаз алды менен асфальт чыкса, ал жерлерди оңдоп-түзөө, жаңылоо жагы подрядчыларга биз тараптан милдеттендирилген. 2 млрд сомду толук өздөштүрүп бүтүүгө биз толук кандуу иш алып барабыз. Буйруса, жыл ичине чейин 100 пайыз ишке ашырууга аракет кылабыз.
– Рахмат маегиңизге. Ишиңизге ийгилик.
Маектешкен Асанбек Пазыл
