Өзбекстандын Олий Мажлисинин Мыйзам чыгаруу палатасынын жыйынында «Өзбек Республикасынын “Латын графикасына негизделген өзбек алфавитин киргизүү жөнүндө” мыйзамына өзгөртүү киргизүү тууралуу» мыйзам долбоору каралды.
Акыркы жылдары өлкөдө өзбек тилин өнүктүрүүгө жана анын мамлекеттик тил катары макамын бекемдөөгө өзгөчө көңүл бурулуп келет. Өзбек тилин үйрөнүүгө болгон кызыгуу да тынымсыз өсүүдө. Ушуга байланыштуу илимий изилдөөлөрдүн жыйынтыктарынын негизинде латын графикасына таянган өзбек алфавитин жана орфографиялык эрежелерди өркүндөтүү зарылдыгы жаралган.
Мыйзам долбооруна ылайык, латын графикасына негизделген өзбек алфавити мурдагы 26 тамга жана 3 тамга айкалышынын ордуна 28 тамгадан жана 1 апостроф белгисинен турат. Ошондой эле айрым тамгаларды колдонуу тартибин тактоо каралган.

Талкуунун жүрүшүндө депутаттар жаңы нормаларды практикага этап-этабы менен жана натыйжалуу киргизүүгө багытталган бир катар сунуштарды киргизишти. Атап айтканда, мыйзам күчүнө киргенге чейин мурда берилген документтердин, улуттук валютанын жана баалуу кагаздардын юридикалык күчү сакталат.
Мындан тышкары, белгиленген мөөнөткө чейин мамлекеттик органдардын жана мекемелердин расмий символдорун, көрнөк-жарнактарын, жол көрсөткүчтөрүн жана башка расмий белгилерин колдонууга уруксат берүү сунушталууда.
Мындай ыкма мамлекеттик органдар менен мекемелер колдонуп жаткан документтерди, бланктарды, көрнөк-жарнактарды, көрсөткүчтөрдү жана башка материалдык каражаттарды бир убакта алмаштыруу зарылдыгын жокко чыгарат. Натыйжада мамлекеттик бюджеттин негизсиз чыгымдарына жол берилбей, өзгөртүүлөрдү этап-этабы менен киргизүү каржылык жактан да ыңгайлуу болот.
Мыйзам долбоорунун кабыл алынышы латын графикасына негизделген өзбек алфавитин жана орфографиялык эрежелерди мындан ары өркүндөтүүгө, мамлекеттик тилдин колдонуу мүмкүнчүлүктөрүн кеңейтүүгө жана аны санариптештирүүнү өнүктүрүүгө өбөлгө түзөрү белгиленди.
Мыйзам долбоору депутаттар тарабынан кабыл алынып, кароо үчүн Сенатка жөнөтүлдү.


















