Кыргызстандын Улуттук коопсуздук мамлекеттик комитетинин (УКМК) Чек ара кызматы Чаткал районунун Айгыр-Жал айылынын эки тургуну жоголгондугу тууралуу кабарды тастыктады.
Маалыматка караганда, 2025-жылдын 15-августунда Өзбекстандын аймагында, Кыргызстан, Өзбекстан жана Казакстандын чек аралары кошулган аймакта өзбек чек арачылары белгисиз эки жаранды байкашкан. Кармоо аракети учурунда алар талаптарга баш ийбей койгондуктан, курал колдонулуп, жарандар ок жаракатынан каза болгон.
2025-жылдын 31-августунда каза болгондордун туугандары Өзбекстанга барып, алардын өздүгүн аныкташкан. Андан кийин, 1-сентябрда маркумдардын сөөгү «Баймак» көзөмөл-өткөрүү пункту аркылуу Кыргызстанга өткөрүлүп берилип, экспертиза жүргүзүү үчүн Кербен шаарына жеткирилди.
Мындан тышкары, өзбек тарап каза болгон жарандардын мүлкүн – үч жылкы менен чатырды кыргыз тарапка өткөрүп берүүгө даяр экенин билдирген.
Кыргызстан жана Өзбекстандын чек ара ведомстволору 2-сентябрдан тарта окуя болгон жерде биргелешкен иликтөө жүргүзүүнү макулдашышты.
УКМКнын Чек ара кызматы жарандардын каза болушуна терең тынчсыздануусун билдирип, бул факты боюнча иликтөөнүн жыйынтыктары коомчулукка кошумча кабарланарын билдирди.


















