Тянь-Шань тоо кыркаларындагы Ысык-Көл облусунун Түштүк Эңилчек мөңгүсүнүн аймагында жайгашкан бийиктиги 5576 метр бийиктиктеги тоо чокусуна «Бириккен Улуттар Уюмунун чокусу» деген географиялык аталыш ыйгарылды.
Бул тууралуу президент Садыр Жапаров бүгүн, 2-июлда, БУУнун Башкы катчысы Антониу Гутерришти кабыл алуу учурунда тоонун аты өзгөргөнү тууралуу сертификат тапшыруу учурунда белгилүү болду.
Президенттин сайтында расмий айтылгандай, аталган тоонун аты жок болчу. Ошондуктан, өлкө башчы БУУнун планетадагы бардык адамзат үчүн тынчтыкты жана гүлдөп-өнүгүүнү сактоо сыяктуу ири иштери үчүн, аталган чокуга дүйнөлүк уюмдун атын ыйгаруу чечимин кабыл алганы кабарланды.
Дүйнөдө бийик чокуларга жаңы ат берүү салты дагы деле жашап келет. Андай көрүнүш Кыргызстанда да бар. Мисалы, былтыр, 2023-жылдын 10-ноябрда, президент Жапаров Ысык-Көлдүн Жети-Өгүз районунун Ак-Шыйрак тоо кыркаларындагы № 354 аты жок мөңгүгө Бириккен Араб Эмиратынын негиздөөчүсү Шейх Заед бин Султан Аль Нахайяндын ысымын ыйгарган жарлык чыгарган. Бул чечим коомчулукта бир топ талкууларды жараткан.
Советтер мезгилинде кыргыз-тажик чек арасында жайгашкан 7134 метрлик бийиктиктеги “Жел-Айдар” тоосуна Лениндин аты берилген. Кийин 2017-жылы, ошондогу президент Алмазбек Атамбаевдин жарлыгы менен “Ленин пик” “Манас-Ата зоосу” деп өзгөртүлгөн.
Ал эми 2011-жылы өлкө башчы болуп турган Атамбаев өз жарлыгы менен Бишкек шаарынан анчалык алыс эмес жердеги Ак-Суу капчыгайында жайгашкан чокуга Россиянын президенти Владимир Путиндин ысымы ыйгарылган. Анын бийиктиги деңиз деңгээлинен 4446 метрге жетет. Кезинде Путиндин аты коюлган чокунун расмий аты болбогону айтылган менен кийин жергиликтүү тургундар “Жаман эчки” деп аташаарын айтып чыгышкан.
Мындан сырткары, Орусияныны биринчи президенти Борис Ельциндин да аты Каракол шаарынын четиндеги тоо кыркалардагы чокулардын бирине коюлган.

















