Туристтик сезондун мезгилинде ИИМдин ыкчам бөлүмдөрү тарабынан укук бузууларды жана кылмыштарды табуу жана бөгөт коюу, уюшкан кылмыштуулуктун көрүнүштөрүнө каршы аракеттенүү боюнча иш-чаралар жүзөгө ашырылууда. Бул тууралуу ИИМдин Басма сөз кызматы билдирди.
Буга чейин башка бирөөнүн мүлкүн уурдоого шектелген криминалдык топтун мүчөлөрү кармалган. Туристтик сезондо Ысык-Көл облусуна өлкөнүн ар кайсы аймактарынан жана чет мамлекеттерден келген эс алуучулардын саны абдан көбөйөт. Бул багытта туристтердин коопсуздугун камсыз кылуу негизги милдет болуп, эл көп чогулган жерлерде ИИМдин Кылмыш иликтөө башкы башкармалыгынын, Бишкек шаардык ИИББнын Кылмыш иликтөө бөлүмүнүн, Ысык-Көл ОИИБдин жана Ысык-Көл РИИБдин кызматкерлеринен турган ыкчам топтор иш алып барууда.
Алдын алуу иш-чараларынын комплекси жүзөгө ашырылып, туристтердин коопсуздугун камсыздоо үчүн бардык аракеттер көрүлүүдө. Оңой жол менен пайда тапканды жакшы көргөндөр дагы эс алууга келишет. Мындай адамдар өздөрүнүн кылмыштуу аракеттери менен мамлекеттин кадыр-баркына эбегейсиз чоң зыян келтиришет. Атайын операциянын жүрүшүндө кылмыш иликтөө кызматкерлери тарабынан чөнтөкчүлөр тобу кармалды. «Гастролёр» деп аталган кылмышкерлер 7 жана 8-июлда Бостериге келип, топторго бөлүнүп, коомдук жайларда кылмыш кылышкан.
8-июль күнү Ысык-Көл облусунун аймагынан милиция кызматкерлери тарабынан кылмышка шектүүлөр бара жаткан Ауди А-6 үлгүсүндөгү унаа кармалган. Унаанын салонун текшерүү учурунда уурдалган 6 уюлдук телефон табылып, алынган. Шектүүлөрдүн жашаган жерин тинтүү учурунда дагы 2 даана телефон жана 95 миң сомдон ашык уурдалган акча табылган.
Аталган кылмыш ишинин алкагында жүргүзүлгөн ыкчам-издөө иш-чараларынын жүрүшүндө 10 шектүү Тергөө бөлүмүнө жеткирилген: Талас облусунун тургуну 1998-жылы туулган А.А. (ушул кылмыштуу топтун лидери), Нарын облусунун тургуну 1992-жылы туулган К.Э., Талас облусунун тургуну 1993-жылы туулган А.Т., Ош облусунун тургуну 1988-жылы туулган А.Т., Чуй облусунун тургуну 1997-жылы туулган Ж.Д., Ош облусунун тургуну 1992-жылы туулган К.Т., Чуй облусунун тургуну 1994-жылы туулган Ж.Б., Бишкек шаарынын тургуну 1996-жылы туулган Т.Н., Ош облусунун тургуну 1995-жылы туулган М.Н. жана Ош облусунун тургуну 2001-жылы туулган А.А.
Бул кылмышка шектүү жарандардын баардыгы мурда бир нече жолу сот жообуна тартылган, уюшкан кылмыштуу топтун мүчөлөрү катары ИИМдин ыкчам каттоосунда турушат.
Уурдалган 8 телефондун ичинен 4 уюлдук телефондун ээлери аныкталган.
Бардык уюлдук телефондор 7-8-июль күндөрү уурдалган. Кылмыш иликтөө кызматкерлери телефондорду ээлерине кайтарып беришкен.
Учурда төмөндөгү жараныдрдын ушул сыяктуу башка кылмыштарга тиешеси бар жогу текшерилип, тергөө иштери жүргүзүлүүдө.
ИИМ жайкы туристтик сезондо коомдук тартипти жана жарандардын коопсуздугун сактоо боюнча комплекстүү иш-чараларды ишке ашырууда. Бул иш-чаралардын негизги максаты – жарандардын жана туристтердин өлкөдө коопсуз жана ыңгайлуу болушун камсыз кылуу.



















