Венесуэла өкмөтү оппозициянын лидери Мария Корина Мачадо Тынчтык боюнча Нобель сыйлыгын алган соң Норвегиядагы өз элчилигин жапты.
Республика бийлиги «улуттук приоритеттерди баалоо» жүргүзүп, дипломатиялык кызматты «кайра түзүү» жана «ресурстарды стратегиялык бөлүштүрүү» чечимин кабыл алганын билдирди. Ушуга байланыштуу «ага-ини мамиледеги» Зимбабве жана Буркина-Фасодо жаңы элчиликтер ачылып, ал эми Норвегия менен Австралиядагы дипломатиялык өкүлчүлүктөр жабылат.
Норвегиянын Тышкы иштер министрлиги Каракас элчилигин түшүндүрмөсүз жапканын билдирип, буга өкүнүчүн билдирди. «Кээ бир маселелер боюнча биздин көз караштар ар башка болгонуна карабастан, Норвегия Венесуэла менен диалог жүргүзүүгө умтулат жана бул багытта иш алып барат», — деди министрликтин өкүлү. Королдуктун Венесуэлада элчилиги жок, ал жактагы маселелерди Колумбиянын борбору Боготадагы өкүлчүлүгү аркылуу жүргүзөт.
Эске салсак, Тынчтык боюнча Нобель сыйлыгын Норвегия парламентине тандалган беш мүчөдөн турган комитет ыйгарат. Мачадо бул сыйлыкты «Венесуэла элинин демократиялык укуктарын алдыга сүрөө жана диктатурадан демократияга тынч жана адилеттүү өтүү үчүн жүргүзгөн тынымсыз күрөшү» үчүн алган. Бул окуядан кийин өлкө президенти Николас Мадуро өз каршылашын «жооруган сыйкырчы» деп атап сынга алган.
Мачадо 2024-жылдагы президенттик шайлоодо оппозициянын бирдиктүү талапкери болгон, бирок бийлик ага талапкер катары катышууга тыюу салган. Натыйжада ал Эдмундо Гонсалести колдогон жана эсеп барактарынын маалыматтарына караганда, Гонсалес Мадуродон алдыга чыккан. Бирок расмий бийлик эч кандай далил келтирбестен, жеңүүчү деп Мадурону жарыялаган. Мындан соң өлкө боюнча миңдеген адамдар Мадурого каршы нааразылык акцияларына чыгышкан.
Европарламент жана АКШнын Мамлекеттик департаменти да Венесуэланын мыйзамдуу шайланган президенти катары Гонсалести тааныган.
Мачадо Нобель сыйлыгын өзүнүн саясий кыймылы үчүн «эң чоң таануу» деп атап, бул чечим Венесуэла элине «эркиндикке жетүүгө шыктануу берет» деди. Ошондой эле ал АКШ президенти Дональд Трамптын «катуу колдоосун» жогору баалап, сыйлыгын ага да арнаганын белгиледи.

















