Россиянын президенти Владимир Путин менен Өзбекстандын президенти Шавкат Мирзиёев телефон аркылуу сүйлөшүү өткөрүшкөнүн Кремлдин басма сөз кызматы маалымдады.
«Орус-өзбек стратегиялык өнөктөштүк жана союздаштык мамилелерин мындан ары өнүктүрүү маселелери бир катар багыттар боюнча талкууланды, — деп айтылат билдирүүдө. — Айрыкча энергетика тармагындагы ири биргелешкен долбоорлорду ишке ашырууга өзгөчө көңүл бурулду».
«Россия менен Өзбекстандын аймактарынын өз ара кызматташуусу соода-экономикалык жана маданий-гуманитардык байланышты чыңдоодо маанилүү рол ойной турганы белгиленди. Ошондой эле быйыл октябрь айында Москва облусунда өткөн Россия жана Өзбекстандын аймактар кеңешинин жыйынынын жогорку практикалык жыйынтыктары баса белгиленди», — деп билдиришти Кремлден.
Мындан тышкары, эки мамлекеттин лидерлери эл аралык актуалдуу маселелерди талкуулап, ар түрдүү деңгээлдеги үзгүлтүксүз байланыштарды улантуу жөнүндө макулдашышты.

















