Албетте, кымбатчылык жакадан алып турганда ун, нандын кымбатташы карапайым элге оор тиет. Бирок, акыркы убактарда кымбатчылыкка карабай нан Кыргызстанда, айрыкча Бишкекте кор болуп эле жатат.
Шаардын таштанды челектеринде ыргытылган нан толтура. Анын баары борбордук таштандыга барып жатат. Таштандынын жанындагы Алтын-Казык жаңы конушунун тургундары уйларына ыргытылган нандарды чогултуп тоют катары беришерин өз көзүм менен көрүп зээним кейиген. Азыр жол жээктеринде деле тебеленип жаткан нан көп. Андыктан ундун кымбатташын Жараткандын сыноосу деп түшүнүп, унду, нанды баалаганды үйрөнөлү.
Тема боюнча:
«Казакстандын эле унун алып келбейсиңби, биздики камырга жарабайт» деп мурдун чүйрүгөн кыз-келиндер, апалар да эсибизге келели. Кыргызда «бок жаман эмес, жок жаман» деген сөз бар. Эмитен балдарга кара ундан да нан жасап берүү менен аларга жок эмне экенин, кара нан ден соолукка да пайдалуу экенин түшүндүрүшүбүз керек.
Буга чейин «Кыргыз Туусу» гезитине Россия, Казакстан ун берүүнү токтотсо нандын, дандын, суунун, жер иштетүүнүн кадырын билебиз деп жазып эле келгенбиз. Эми эсирген эл да, жасалма маалымат менен элди тойгузган Айыл чарба министрлиги да мындан сабак алышы керек. Кыскасы, ун, нан кымбаттаганына ар кимди айыптай бербей, күнөөнү ар кимибиз өзүбүздөн издешибиз керек.
Балдарга Улуу Ата Мекендик согуштагы, Улуу Үркүн маалындагы, 30-жылдагы ачарчылыктын азабын түшүндүрүшүбүз керек. Антпесе эгемендүүлүктөн кийинки муун, ага чейинки айрым адамдар деле нандын кадырын али биле элек.
Мелис Совет уулу,
(макала автордун Фейсбуктагы барагынан алынды).
