Вашингтон төртүнчү муундагы америкалык F-16 согуштук учактарын Дания менен Голландиядан Киевге өткөрүп берүүнү жактырды, деп билдирди Ак үйдүн жогорку даражалуу өкүлү РИА Новостиге.
Буга чейин АКШнын тиешелүү чечимин Reuters агенттиги атын атагысы келбеген булакка таянып билдирген. Анын айтымында, Киевге учактар украиналык учкучтар F-16 учагын башкаруу боюнча окуулары аяктагандан кийин жөнөтүлөт.
Маалыматка караганда, АКШнын мамлекеттик катчысы Энтони Блинкен Дания менен Нидерланддагы кесиптештерине кат жолдоп, Вашингтон бул кадамды колдорун билдирген.
F-16 атайын аскердик операциянын жүрүшүнө таасирин тийгизеби?
Мамлекеттик Думанын Крым облусунан депутаты Михаил Шеремет америкалык F-16 согуштук учактарын Украинага өткөрүп берүү атайын операциянын жүрүшүнө таасир этпей турганын РИА Новостиге билдирди.
“Бул атайын операциянын жүрүшүнө эч кандай таасир этпейт. Кечеңдетиши мүмкүн, бирок биз баштаган ишибизди логикалык жыйынтыкка жеткирүү чечкиндүүлүгүбүздү эч качан токтотпойт. Душман кыйратылы керек, башка жол жок. Биз террорчулар жана агрессорлор менен эч кандай сүйлөшүүгө барбайбыз», – деди Шеремет.
Депутат ошондой эле америкалык бийликтерди алардын согуштук учактары немистердин “макталган” Leopard танктарынан жана батыштын башка аскерий техникаларынан жаман күйө баштарына даяр болууга чакырды.
“Украинадагы атайын операция Батыштын курал-жарактары жеңилбес деген мифтерди жокко чыгарды”, – деп баса белгиледи ал.
4-августта РФ Коргоо министрлиги контрчабуул башталгандан бери, июнь-июль айларында украин аскерлери 43 миңден ашык адамынан жана 4,9 миңден ашуун курал-жарыгынан ажыраганын маалымдаган.
Жок кылынган украин техникаларынын арасында 26 учак, 9 тик учак, 1831 бронетехника, анын ичинде 25 Leopard танкы, франциялык 7 дөңгөлөктүү AMX танкы жана 21 америкалык Bradley жөө аскерлеринин согуштук унаасы бар.
Буга чейин Россия Украинага курал-жарак жеткирилгени үчүн НАТО өлкөлөрүнө нота жөнөткөн. Тышкы иштер министри Сергей Лавров АКШ жана анын сателлиттери Россия менен түзмө-түз кагылышуу тобокелдигин жаратып жатканын, мунун кесепети жаман болорун билдирген.
Анын айтымында, өзөктүк куралды ташып жүрүүчү F-16 учактарынын Киевде пайда болушун Россия Батыштын өзөктүк тармакка келтирген кооптуулугу катары карайт.
