Роботтун эс тутуму жакшы болгондуктан, ал бардык Jeppesen навигациялык карталарын эсине сактай алат. Ошол эле учурда адам учкуч мынчалык көп маалыматты эсине сактап кала албайт.
“Euronews” маалымдагандай, акыркы жылдарда жасалма интеллект (AI) жана робототехника укмуштуудай масштабда өнүгүп жатат, ал тургай эксперттер жакында технологиялар көпчүлүк кесиптердеги адамдардын ордун – жерде гана эмес, асманда дагы алмаштырат деген божомолдорун айтышууда.
Алсак Түштүк Кореянын алдыңкы технологиялар институтунун (KAIST) инженерлер жана изилдөөчүлөр тобу учурда учактын кабинасында эч кандай өзгөртүүлөрдү талап кылбастан учакты башкара ала турган гуманоид роботту иштеп чыгууда.
“Pibot” аттуу робот механикалык колдору менен учак титиреп турганда да кабинадагы баскычтарды басып, пульттагы рычагдарды тарта алат. Робот ар кандай тилдердеги эң татаал инструкцияларды жаттап алат, демек анын ар кандай типтеги учактарга ыңгайлашуусу жогору.
Кореялык иштеп чыгуучулар тобу “Pibot” алгач адамдар үчүн иштелип чыккан колдонмолорду “түшүнүп” жана “эстеп” калуусу чоң тил модели (LLM) технологиясындагы акыркы жетишкендиктердин аркасы менен мүмкүн болгонун ырасташты.
Алардын айтымында, робот учакты катасыз башкара алат, ошол эле учурда өзгөчө кырдаалдарда кесиптештерине караганда тезирээк реакция кылат.
Анын эс тутумуна учактарды эксплуатациялоо, көйгөйлөр жана өзгөчө кырдаалдар боюнча нускамалар сакталган. Мындан тышкары, “Pibot” абадагы учактын абалына жараша реалдуу убакытта коопсуз маршрутту тандап, диспетчерлер жана кабинадагы адамдар менен үн синтези аркылуу байланышып, учкучтун да, анын жардамчысынын да ролун ойной алат.
Робот азырынча адамдын катышуусу мүмкүн болбогон экстремалдык кырдаалдарда колдонууга арналган.
Бийиктиги 160 см жана салмагы болжол менен 65 кг болгон гуманоид робот авиация тармагынан тышкары, унаа, танктарды мыкты айдап тим болбостон, ал тургай деңиз кемесин да башкара алат.
Робот толугу менен 2026-жылга чейин иштелип бүтөт.
KAISTдин маалыматы боюнча долбоор Түштүк Кореянын коргонуу технологияларын изилдөө боюнча жооптуу Коргоону өнүктүрүү агенттиги (ADD) – мамлекеттик орган тарабынын буйрутмасы менен ишке ашырылууда.



















