«Air Online» сайтынын маалыматына караганда, Перс булуңундагы Кызматташтык кеңешине кирген алты араб өлкөсүндө жүргүнчү учактарынын каттамдары кескин азайган.
Маалыматка ылайык, АКШ менен Израилдин Иранга каршы биргелешкен чабуулдары 28-февралда башталгандан кийин, март айынын аягынан май айынын башына чейинки мезгилде бул өлкөлөрдөгү жүргүнчү аба каттамдары 69 пайызга чейин кыскарган.
Кийинчерээк аймактагы аэропорттордогу аба каттамдары бир аз жанданганы менен, кайрадан болжол менен 30 пайызга азайган.
Адистер мындай абалды аймактагы белгисиздиктин күчөшү жана Йемен тараптан Сауд Арабиясынын жарандык энергетикалык объектилерине, ири аэропортторуна жана аскердик базаларына чабуулдардын башталышы менен байланыштырышат.
Сауд Арабиясында коммерциялык каттамдар борбор шаар Эр-Рияддан алыстай баштаган. Натыйжада Эр-Рияддагы Король Халид эл аралык аэропортунда учактардын конуусу жана учуп чыгуусу 32 пайызга азайган.
Бул көрсөткүчтөр Жакынкы Чыгыштагы коопсуздук кырдаалынын аймактагы жарандык авиацияга түздөн-түз таасирин тийгизип жатканын көрсөтөт.
ЕASA Перс жана Оман булуңдарынын үстүндөгү учууларды чектөө боюнча сунуштарын ноябрдын ортосуна чейин узартты
Европа Биримдигинин Авиация коопсуздугу агенттиги (EASA) коопсуздук тобокелдиктерине байланыштуу Перс жана Оман булуңдарынын үстүндөгү аба каттамдарын чектөө боюнча сунуштарынын мөөнөтүн 2026-жылдын ноябрь айынын ортосуна чейин узартты.
Чыр-чатак зонасы жөнүндө маалымат бюллетенинде Перс булуңу жана Оман булуңунун үстүндөгү аба мейкиндиги жарандык авиация үчүн жогорку тобокелдик аймагы катары классификацияланган.
Агенттиктин расмий маалыматына ылайык, 2026-жылдын июль айында чыгарылган эскертүүнүн күчүндө болуу мөөнөтү ноябрь айынын ортосуна чейин узартылды.
Жөнгө салуучу авиакомпанияларга Бахрейн, Кувейт, Катар жана Бириккен Араб Эмираттарынын үстүнөн, ошондой эле Оман булуңунун айрым бөлүктөрүндө бардык бийиктик эшелондорунда учуудан баш тартууну катуу сунуштады. Бул чечим АКШ менен Ирандын ортосундагы чыңалуунун күчөшү, аймакта үзгүлтүксүз соккулардын жасалышы, ошондой эле учкучсуз учактар менен ракеталык системалардын колдонулушу уланып жаткан шартта кабыл алынды.
EASAнын түшүндүрмөсүнө ылайык, учурдагы кырдаал жарандык авиация үчүн бир катар коркунучтарды жаратууда. Алардын арасында жарандык учактардын жаңылыш түрдө аскердик бута катары таанылып калуу коркунучу, абадан коргонуу системалары иштеп жаткан аймактарга учактардын кирип кетүү ыктымалдыгы жана ракеталарды кармоо учурунда түшкөн сыныктардын учактарга тийүү коркунучу бар.


















