АКШнын мурдагы лидери Дональд Трамп учурдагы президенти Жо Байден ноябрдагы шайлоодо жеңип, президент болсо АКШдан “эч нерсе калбайт” деп билдирди.
Бул тууралуу Трамп 27-июнда президенттик шайлоо алдындагы Байден менен алгачкы дебат учурунда билдирди.
“Эгерде бул шайлоодо ал (Байден – ред.) жеңишке жетке, биздин өлкөдө кыйын абалдан чыгуу үчүн бир дагы мүмкүнчүлүк болбойт. Өлкөбүздөн эч нерсе калбашы да мүмкүн. Баары жаман акыбалда турат. Ал өлкөбүздүн тарыхындагы эң начар президент”, – деди Трамп.
Ал эми Байдендин айтымында, тарыхтагы эң начар америкалык лидер – Трамп. Байден социологиялык сурамжылоого таянып: “Бул факт, бул божомол эмес” деди.
Трамп буга жооп берип, сурамжылоолор мунун тескерисин көрсөтүп жатканын айтты.
“Аны эң начар деп, ал эми мени эң мыктылардын бири деп баалашууда”, – деди республикачыл саясатчы.
Байден бул рейтингдерден мисал келтирүүнү суранды, Трамп ага көрсөтүүнү убада кылды.
“Ал тарыхтагы эң начар президент жана муну баары билет”, – деп жыйынтыктады Трамп.
27-июнь күнү кечинде АКШнын тарыхында азыркы жана мурдагы президенттин ортосундагы биринчи теледебат Атлантада СNN телестудиясында болду. АКШдагы президенттик шайлоонун тарыхында теледебат алгачкы жолу эрте, ноябрь айында өтүүчү президенттик шайлоого төрт ай калганда жана талапкерлерди расмий көрсөтүүгө чейин уюштурулду. Саясатчылардын микрофондорунун үнү алардан сөз талап кылынмайынча өчүрүлгөн. Дебат өтүп жаткан студияда АКШнын тарыхында биринчи жолу көрүүчүлөр болгон жок, ал жерде операторлор, модераторлор жана катышуучулар гана болду.
















