Россиянын президенти Владимир Путин менен Казакстандын президенти Касым-Жомарт Токаев телефон аркылуу сүйлөшүүдө эки тараптуу кызматташууну талкуулашты, деп билдирди Кремлдин басма сөз кызматы.
«Казакстан президентинин жакында Россияга боло турган мамлекеттик сапарына даярдык көрүүнүн алкагында бир катар практикалык маселелер талкууланды», — деп айтылат билдирүүдө.
Мындан тышкары, лидерлер стратегиялык өнөктөштүк менен союздук мамилелерди чыңдоого жана соода-экономикалык, маданий-гуманитардык тармактарда биргелешкен долбоорлорду ишке ашырууга даяр экенин белгилешти.
Президенттердин акыркы жолу жолугушуусу 10-октябрда Душанбе шаарында өткөн КМШ саммитинин алкагында болгон.
Алар ошондой эле эки тараптуу байланышты, өзгөчө Казакстанда АЭС куруу жана товар жүгүртүүнү талкуулашты.



















