Казакстан президенти Касым-Жомарт Токаев тышкы иштер министри Мурат Нуртлеуни ээлеген кызматынан бошотуп, аны эл аралык иштер боюнча жардамчысы кылып дайындады.
Казакстандын жаңы тышкы иштер министри болуп буга чейин республиканын Орусия Федерациясындагы элчиси болуп иштеген Ермек Кошербаев дайындалды.
Бул тууралуу Акорда сайтында маалымдалды.
Ермек Кошербаев 2025-жылдын февраль айынан бери социалдык маселелер боюнча вице-премьер-министр болуп иштеп келген. Ага чейин ал Чыгыш Казакстан облусунун акими болуп иштеген. Ага чейин Казакстандын Орусиядагы элчиси жана Тышкы иштер министрлигинин жооптуу катчысы болуп иштеген.
Токаев 21–23-сентябрда АКШга жумушчу сапар менен барып, БУУнун Башкы Ассамблеясынын 80-сессиясына катышкандан кийин өз администрациясында кадрдык өзгөртүүлөрдү жасады. Президенттин басма сөз кызматы маалымдагандай, ал эл аралык иштер боюнча жардамчысы Ержан Казыханды кызматтан бошотуп, аны Женевадагы БУУнун бөлүмүндөгү Казакстандын туруктуу өкүлү кылып дайындады. Ошондой эле Токаев эл аралык экологиялык кызматташтык боюнча атайын өкүл Зульфия Сулейменованы, илим боюнча кеңешчи Кунсулу Закарьяны, президенттин жардамчылары Канат Шарлапаев менен Тамара Дуйсенованы кызматтан бошотуп, башка да кадрдык өзгөрүүлөрдү жүргүздү.



















