Эгерде ушул убакка чейин Титаникти тарыхтагы эң чоң круиздик кеме деп ойлоп жүрсөңүз жаңылышасыз, анткени өткөн жумада дүйнөдөгү эң чоң, Титаниктен беш эсе чоң белгилүү “Icon of the Seas” кемеси жети күндүк саякаттан ийгиликтүү кайтып келди.

Кеме 28-январда Флоридадагы Майами портунан чыгып, Кариб деңизинде жети күн бою саякаттады.

Узундугу 365 метр болгон лайнер сүзүп жүргөн шаарды элестетет жана Титаниктен беш эсе оор: анын салмагы 250 миң тоннадан ашык, ал эми 20 палубасы дээрлик 10 миң адамды – 7600 конокту жана 2350 экипаж мүчөсүн батыра алат.
![]()
Кеме “Royal Caribbean International” круиздик компаниясы тарабынан 2 миллиард долларга курулган.
![]()
Кемеде эс алуучулар үчүн 40тан ашык ресторан, кафе-барлар, театр, караоке, спорт аянтчалары, тропикалык парк, 7 бассейн, аттракцион жана круиздик кемеде курулган эң чоң аквапарк бар.
![]()
Кеменин алды жагында концерттик зал орун алган.

Ал жерде кечинде ар кандай оюн-зоок программалары, муз үстүндөгү шоу көрсөтүлөт.

Билеттин баасы киши башына 1723 доллардан 2639 долларга чейин. Алгачкы рейске билеттер сатыкка 2022-жылдын октябрында коюлуп, бир нече сааттын ичинде баары сатылып кеткен.



















