Тажикстандын премьер-министри Кохир Расулзода Иранда расмий сапар менен жүрөт. Сапар Ирандын биринчи вице-президенти Мохаммадреза Арефтин расмий чакыруусу менен ишке ашырылды.
Расулзода делегацияны жетектеп Иранга 17-февралда барган.
Ал ошондой эле Үчүнчү Каспий экономикалык конференциясына атайын конок катары катышаары күтүлүүдө.
Үчүнчү Каспий экономикалык конференциясы 17-18-февралда Тегеранда Россия, Түркмөнстан, Казакстан жана Азербайжандын өкмөт башчылары жана министрлеринин катышуусунда өтөт.
Сапардын алкагында Тажикстандын премьер-министри Ирандын биринчи вице-президенти Мохаммадреза Ареф менен жолугушту.

Тажикстандын өкмөт башчысы сүйлөшүүлөр достук маанайда өткөнүн билдирди.
«Иран президентинин Тажикстанга сапары эки өлкөнүн мамилелеринин өнүгүүсүндөгү жаңы этаптын башталышы болду», – деди Расулзода.
Эске салсак, Эмомали Рахмон Ирандын президенти Масуд Пезешкян шайлангандан кийин анын ант берүү аземине катышкан. Пезешкян өзү Тажикстанга январдын орто ченинде эки күндүк мамлекеттик сапар менен барган.
Ирандын биринчи вице-президенти Мохаммадреза Ареф өз кезегинде Иран менен Тажикстандын саясий мамилелерине баа берип, эки өлкөнүн ортосундагы саясий мамилелер эң жогорку деңгээлде экенин белгиледи.
Ареф Иран президентинин Тажикстанга болгон сапарында комплекстүү кеңейтүү стратегиясы бекитилип, ал бүгүнкү жолугушууда операциялык фазага өткөнүн белгиледи.
“Биз эки өлкөнүн экономикасы бири-бирин толуктай алат деп эсептейбиз”, – деди ирандык аткаминер.
Ареф жолугушууда жеке сектордун катышуусуна өзгөчө басым жасалганын кошумчалап, эки өлкөнү дагы мындай ишмердүүлүктү өнүктүрүүгө чакырды.
Анын айтымында, эки өлкөнүн ортосундагы виза режиминин жоюлушу саякаттоолордун көбөйүшүнө алып келет жана жеке секторго жардам берет.

















