Өзбекстандын борбор калаасында «Автомобилсиз күн» долбооруна ылайык, чиновниктерди бир күн коомдук транспорт менен жүрүүгө милдеттендирүү каралууда. Бул кадам аткаруу бийлигинде иштегендер жумушка коомдук транспорт менен келип-кетүү аркылуу элге үлгү көрсөтүүсү үчүн жасалууда.
Ташкентте «Автомобилсиз күн» долбоорун ишке киргизилип калса, андагы талапка ылайык борбордо жайгашкан республикалык жана облусттук аткаруу бийлигинин жетекчилери менен катардагы кызматкерлери бир айда бир жолу жумушка коомдук транспорт менен келип-кетүү менен транспорт тыгынын гана азайтпастан, экологиянын булгануусуна да жол бербей, эң негизгиси, элге үлгү көрсөтүшмөкчү.
Мындай демилге быйыл белгиленип жаткан Жаштарды жана бизнести колдоо жылынын алкагында «Өзбекстан – 2030» деп аталган стратегиянын мамлекеттик программасын аткаруу долбооруна сунушталган.
Долбоорду ишке ашыруунун жоопкерчилиги Экология, айлана-чөйрөнү коргоо жана климаттын өзгөрүүсү министрлиги менен Транспорт министрлигине, ошондой эле борбордук хокимиятка жүктөлдү.
Мамлекеттик программанын долбоорун талкуулоо 14-февралга чейин улантылат.



















