Түркмөнстандын тышкы иштер министрлиги Жакынкы Чыгыштагы азыркы кырдаалга байланыштуу Ирандагы чет өлкөлүк жарандардын өлкөдөн коопсуз чыгышына көмөктөшүп жатканын билдирди.
Министрликтин басма сөз кызматынын маалыматына караганда, өлкө чет элдик дипломаттардын жана алардын үй-бүлө мүчөлөрүнүн, ошондой эле учурда Иранда турган башка жарандардын чыгышы үчүн өз аймагын камсыз кылуу боюнча токтоосуз чараларды көрүп жатат.
Маалыматта белгиленгендей, Израил менен Ирандын ортосундагы жаңжал башталгандан бери Түркмөнстандын мамлекеттик чек арасынан Казакстан, Кыргызстан, Өзбекстан, Тажикстан, Румыния жана башка өлкөлөрдөн келген 120га жакын адам өткөрмө бекеттер аркылуу өтүштү.
“Келгендер транспорт, тамак-аш, мейманкана, биринчи керектелүүчү буюмдар менен камсыз болгон”,- деп айтылат министрлик берген маалыматта.
Ошону менен катар, Түркмөнстандын тийиштүү мамлекеттик органдары чет мамлекеттердин дипломатиялык өкүлчүлүктөрү жана эл аралык уюмдар менен тыгыз кызматташатташуусун улантып жатат.
Буга чейин Кыргызстандын тышкы иштер министрлиги Иран жана Азербайжандагы элчиликтер менен биргеликте 28 кыргыз жаранын Азербайжанга өткөргөнүн билдирип, эвакуацияланган жарандар жакынкы күндөрү Кыргызстанга кайтып келерин билдирген.
Иран менен Израилдин ортосундагы абал 13-июндан бери курчуп, эки өлкө бир-бирине сокку урууда.
Соңку маалыматтар боюнча, Израилдин чабуулдарынан Иранда 220дай адам, анын ичинде жогорку даражалуу аскер жетекчилери, өзөктүк программа боюнча иш алып барган окумуштуулар каза болгон.

















