Түркиянын президенти Режеп Тайып Эрдоган Анкаранын максаты Шанхай Кызматташтык Уюмуна (ШКУ) мүчө болуу экенин айтты, анын сөзүн мамлекеттик TRT Haber телеканалы көрсөттү.
“Биздин максат – ал жерде байкоочу-мүчө эмес, туруктуу мүчө болуу. Түркия “Шанхай бештигине” туруктуу мүчө катары кириши керек. Мен бул маселени (Астанадагы) акыркы саммитте (Россия президенти Владимир) Путин, казак кесиптешим (Касым-Жомарт Токаев) менен талкуулап, бул процесске колдоо көрсөтүүнү сурандым», — деди түрк лидери Вашингтондогу маалымат жыйынында.
4-июнда Түркиянын тышкы иштер министри Хакан Фидан өлкө БРИКСке мүчө болууну каалай турганын билдирген. Тышкы саясат бөлүмүнүн башчысы июнь айында Нижний Новгороддо өткөн БРИКС+ жыйынына катышкан. Иш-чарадагы маалымат жыйында ал Анкара уюмдун маанилүүлүгүн көргөнүн билдирген.
ШКУ 2001-жылы негизделген эл аралык уюм. Ага Индия, Иран, Казакстан, Кытай, Кыргызстан, Орусия, Тажикстан, Пакистан жана Өзбекстан кирет. 2024-жылдын 4-июлунда Астанада өткөн саммитте Беларусь аларга расмий түрдө кошулган. Байкоочу өлкөлөр – Афганистан жана Монголия, ШКУ диалогу боюнча өнөктөш өлкөлөр – Азербайжан, Армения, Бахрейн, Египет, Камбоджа, Катар, Кувейт, Мальдив аралдары, Мьянма, Непал, Бириккен Араб Эмираттары, Сауд Арабиясы, Түркия, Шри-Ланка.



















