Кыргызстандын түндүгү менен түштүгүн бириктирген альтернативалуу жолу бүгүн, 1-июндан тартып ачылды. Бул тууралуу КР Транспорт жана коммуникациялар министрлиги билдирди.
Маалыматта айтылгандай, ушул жылдын ноябрь айына чейин убактылуу ачылган бул жол күндүзгү таңкы саат: 6:00дөн, кечки саат 20:00гө чейин гана автоунааларды өткөрөт.
“Айдоочулардын коопсуздугун камсыздоо максатында трассага заманбап жол белгилери, электрондук маалымат такталары жана эскертүү системалары орнотулду. Унааларга октук басымы 11,5 тонналык салмакты сактоо эскертилет”,-деп айтылат маалыматта.
Убактылуу каттам туристтик мезгилде автожолдордогу жүктөмдү азайтуу максатында берилди. Бирок тоннелден өтүү үчүн атайын акы төлөнөт. Ал – автотранспорттун түрүнө жана категориясына жараша 100 сомдон 5 миң сомго чейин алынат.
Жол ачылбай, мөөнөтүнөн кечикти
Аталган жолдун курулушу 2014-жылы башталып, 2023-жылы пайдаланууга бериле турган болгон. Бирок бул жолдун жаңы салынган участкаларында көчкү түшүү коркунучунан улам, кийинкиге калтырылып келди. Кооптуулукту алдын алып, кошумча курулуш иштерин жүргүзүү үчүн кошумча каражаттар бөлүнгөн.

Башкача айтканда, автоунаа жолундагы коопсуздукту күчөтүү максатында, Көк-Арт ашуусундагы тоннелдин түндүк жана түштүк тарабындагы жолдун эң кооптуу тилкелеринде 3 эстакадалык көпүрө, кар көчкүдөн коргоочу 2 галерея, андан сырткары, 324-чакырымында өткөрүү пункту курулууда.
Андан сырткары, 153-чакырымында “Дыйкан” жана Балыкчы шаарында транспорт көзөмөл пункттары иштей турган болууда. Ошондой эле, Жалал-Абад тарабында жана Балыкчыда 2 мобилдик көчмө топ жүк ташуучу автоунаалардын салмак габариттик ченемдеринин сакталышына көзөмөл жүргүзүшөт.

Балыкчы – Кочкор – Чаек – Арал – Казарман – Жалал-Абад багыты боюнча 433 чакырымды түзгөн бул Түндүк-Түштүк автожолу Кыргызстан эгемендик алган жылдардан берки эң чоң долбоорлорунун бири болуп калды. Анын 200гө жакын чакырымы мурда жол жок жерлерге салынган. Курулуштун жалпы наркы 850 миллион доллардан ашык каражат деп айтылган. Акыркы маалыматтар боюнча ага коротулган болжолдуу сумма 1 миллиард долларга жакын деп бааланууда.
Негизги инвесторлору болуп: Кытайдын Эксимбанкы жана Азия өнүктүрүү, Ислам өнүктүрүү банктары саналат. Анын курулушун Кытайдын «China Road & Bridge Corporation» корпорациясы жана бир канча чет мамлекеттик курулуш компаниялар аткарды.
Ачылган жол ак жолтой болсун!
Расмий түрдө быйыл убактылуу болсо да ачылган бул каттамга, жогоруда айтылгандай, туристтик мезгилде өлкөнүн автожолдорундагы жүктөмдү азайтуу максатында уруксат берилди. Айдоочулар мурда Кыргызстандын экинчи борбору Ош шаарынан туристтик Балыкчы шаарына 15 саатта барып жүрүшсө, эми 8 саатта эле жете турган болду.
Жалал-Абаддагы Көк-Арт ашуусундагы тоннел азырынча Кыргызстандагы эң узун тоннел болуп калды. Анын узундугу – 3,890 чакырым, туурасы — 10 – 14 метрге чейин, бийиктиги – 8,6 метрди түзөт. 2 тилкелүү заманбап жолдун жүрүүчү бөлүгүнүн туурасы — 8,5 метр. Эки тарабында тең туурасы 0,75 метрден жөө адамдар өтүүчү жол каралган. Мындан сырткары, аталган жолдун Казарман участкасында 2 эстакадалык көпүрө түшкөн.
Ал эми аталган жол толугу менен 2028-жылы пайдаланууга берилери пландалууда.
А. Белеков
















