Белгилүү кыргыз эл жазуучусу Төлөгөн Касымбеков тарабынан жазылган “Сынган кылыч” романынын негизинде тартыла турган көркөм тасмага азыркы учурда 50 млн сом чогулду, жакында 200 млн сомго жетиши күтүлүүдө. Бул тууралуу тарыхчы Кыяс Молдокасымов Фейсбуктагы барагында жазды. Ал кечээ аталган тасманы тартуу демилгесин көтөргөн Жогорку Кеңештин төрагасы Нурланбек Шакиевдин чакыруусу менен аны менен жолуккан. К. Молдокасымов Н. Шакиев менен жолуккандан кийин эмне тууралуу сөз болгондугун төмөндөгүдөй баяндаган:
“Буюрса “Сынган кылыч” сериал болуп тартылганы калды. “Сынган кылычты” көркөм тасма кылып тартышыбыз керек – деген сөздү айтылып жүргөн сөздүн бири да деп анчалык ишенген деле жокмун. Себеби тарыхый романдагы Нүзүп, Алымбек датка, Курманжан датка, Жаркын айым, Зыйнат датка, Соно айым, Алымкул аталык, Шералы хан жана анын уулдары, Исхак Молдо (Полот хан), Абил бий жана башка каармандарды, бири-бири менен чырмалышкан окуяларды дээрине жеткире көркөм тасма тартууга көп каражат талап кылынары турган иш да. Чыгармадагы көркөмдүктү өз деңгээлинде көркөм тасма аркылуу элге жеткирүү мүмкүнбү?! Мына ушундай күдүк ойлор мээмди ээлеп алган эле.
Жакында “Сынган кылычты” көркөм тасма кылып тарттырабыз деген демилгенин ээси, Жогорку Кеңештин төрагасы Нурланбек Шакиев чакырып, тарыхый роман жана келечекте тартылчу көркөм тасма тууралуу кеңири сүйлөшүп отурдук. Өз сөзүн жүзөгө ашыруу үчүн катуу киришиптир. Эң башкысы каражат маселеси чечиле баштаптыр. Бир аптага жетпей эле 50 миллион сомдун башы чечилгенин, буюрса жакынкы күндөрү 200 миллион сомго жеткирээрин чечкиндүү айтып отурду.
Демек, каражаттын чечилгени, көркөм тасманы тартууга кадамдын башталышы деп ишенимдүү айта берсек болчудай. Нурлан мырза сөздү бийик туткан, сөздү айткандан кийин аткарган жагын мурда эле жакшы билчүмүн. Бул жолу дагы бир жолу ынанып, төбөм көккө жетип чыктым.
Ток этер жери “Сынган кылыч” беш сериалуу көркөм тасма болуп тартылганы калды. Сценарий жазганга, сериалды тартканга эң мыкты жазуучулар, режиссерлор, керек болсо четтен да мыктылар чакырылмай болду. Буюрса чыгармачыл топтун алгачкы отуруму февраль айында болуп, ошол жерде конкреттүү талкуу болуп, иш пландары бекитилип, алдыга көздөй кадам башталганы калды”.
Белгилей кетүүчү жагдай, Н. Шакиев быйыл, 2024-жылы Кара кыргыз автономиялуу облусунун же кыргыз мамлекетинин түзүлгөндүгүнүн 100 жылдыгына карата жазуучу Т. Касымбековдун “Сынган кылыч” романы боюнча көркөм тасма тартууну демилгелеп, ал бир нече серил болорун билдирген.
“Сынган кылыч” романында жазуучу Орусия империясынын Түркстанды учурдагы Орто Азияны басып алышындагы айрым жергиликтүү башкаруучулардын ойногон ролун, калктын көтөрүлүшүн усталык менен талдап берген.
Бул роман кыргыз элинин улуттук тарыхындагы өзүнчө бир доор – Кокон хандыгы мезгилиндеги элдин коомдук абалын көркөм сүрөттөгөн тарыхый роман. Чыгармада айрым коомдук өнүгүүнүн терең катмарларына жасалган тарыхый экскурстарды эске албаганда да, Алим хан такка олтурган 1801-жылдан Исках-Болот хан даргага асылган 1876-жылга чейинки 75 жыл ичиндеги элдин башынан өткөн окуялар чагылдырылган. 75 жыл бир кылымга жакын убакытта элдин күрөшү, мүдөөсү, ойлоп тапкан амалы бир максатка багытталган. Ал – өз алдынча, көз карандысыз мамлекет куруу, улуттук намыстын туусун бийик кармоо, улуттук эркиндикти эңсөө. Жазуучу эркиндиктин, көз карандысыздыктын символу катары канаттуунун падышасы – бүркүттү тандаган.






















