Бизнесмен жана жогорку даражалуу аткаминерлер менен байланышы бар экенин айтып, керек болсо силерди жок кылам деп коркутуп, инвесторлордон опузалап ири өлчөмдө акча талап кылган жаран кармалды.
Бул туурасында президенттин маалымат катчысы Эрбол Султанбаев соцтармактагы баракчасына жазды.
Анын айтымында, Кыргызстанда акыркы эки жарым жылдан бери инвестицияларды тартууга өзгөчө көңүл буруп келет. Бул иш президент Жапаровдун жеке көзөмөлүндө. Мамлекет башчысы ар дайым “инвесторлорго жагымдуу шарт түзүү керек” деген талапты бардык мамлекеттик органдарга, тийиштүү мекемелерге коюп келет.
“Өзүңүздөргө маалым болгондой өлкөгө түз инвестицияларды тартуу иши оңой эмес. Ошол эле учурда бүгүнкү күндө тилекке каршы, инвесторлордун өлкөбүздө ишмердүүлүгүнө жолтоо болгон учурлар бар.
Мисалы акниет эмес бир жаран кармалды. Ал өзү бизнесмен жана жогорку даражалуу аткаминерлер менен байланышы бар экенин айтып, керек болсо силерди жок кылам деп коркутуп, инвесторлордон опузалап ири өлчөмдө акча талап кылган”, – деп жазды Султанбаев.
Анын айтымында, бул маалымат президент Жапаровго жеткен жана ал териштирүү тапшырмасын берип, анын жыйынтыгында бул жаран кармалып, камакка алынды. Андан ары тергөө иштери жүрөт.
“Президент Жапаров дагы бир жолу Кыргызстанда “кол тийбестер” жок экендигин эскертет. Өлкөдө кимде-ким инвесторлорду жогорку даражалуу байланыштары менен коркутуп-үркүтүп, алардын ишмердүүлүгүнө жолтоо болсо, инвесторлорду жеке кызыкчылыгына пайдаланып, алардан мыйзамсыз акча каражатын талап кылса — дароо камалат. Өлкө башчысын адаштырып коебуз же ал эч нерсе билбей калат” дегендер болсо, алар катуу жаңылышат”, – деп кошумчалады маалымат катчы.
Анын айтымында, президент Жапаров УКМК, ИИМ жана башка жеке булактарынан ыкчам маалыматтарды дайыма алып турат. Учурда Мамлекет башчысында дагы кимдер “жогорку байланыштарына” жамынып инвесторлорду коркутуу, акча талап кылуу менен алектенип жаткандыгы тууралуу маалыматтар бар.
“Арам ойлорун ишке ашырам дегендер үчүн абактарда орундар жетиштүү”, – деди Эрбол Султанбаев.
ИИМ иштин чоо-жайын айтты
ИИМдин маалымат кызматы чет элдик инвесторлордон өзгөчө ири өлчөмдө (200 миң АКШ доллары) акча каражатын талап кылган жарандар кармалганын маалымдады.
Маалыматка караганда, 24-сентябрда ИИМдин тергөө кызматына Х.С. аттуу башка мамлекеттин жараны арыз менен кайрылып, 22-августтан 16-сентябрга чейинки убакытта Н.Т. аттуу арыздануучунун таанышы «Ислам» жана «Фазиль» аттуу уулдары менен кылмыштуу сүйлөшүп, белгисиз маркадагы ок атуучу курал менен анын үй-бүлөсүнө зыян келтиребиз деп коркутуп, башка өлкөнүн үч жаранына арыздануучуга карата арыз жазууга мажбурлашканын айткан. Анда, Президенттик администрациянын жаңы имаратын куруп жаткан жумушчулардан ар биринен 150 миң сом акча каражатын алган деп билдирген.
16-сентябрда Т.Н. Бишкек шаарындагы үйлөрдүн биринде болуп, Х.С.ны каматам деп жана жогорку кызматтагы адамдар менен коркутуп, республиканын укук коргоо органдары ага карата материалдарды жана арыздарды чогултуп жаткандыгы тууралуу терс маалыматтарды берип, дагы бир жолу жакшылап ойлонорун айтып кеткен.
17-сентябрь күнү Т.Н. борбор калаада жайгашкан кафелердин биринде Х.С.ны шантаж кылууну улантып, жумушчулардын арызы менен коркутуп, 200 миң АКШ долларын талап кыла башташкан.
Ошол эле күнү бул кылмыш ишинин алкагында 1978-жылы туулган Н.Т.нын жашаган жерине тинтүү жүргүзүлүп, анын “BMW X7” үлгүсүндөгү унаасынан өзгөчө жыты бар кочкул жашыл түстөгү баңги заты, темир кастети жана 11 даана патрондор табылып, алынган.
Аталган кылмыш ишинин алкагында 24-сентябрда 2001-жылы туулган Н.И., 1997-жылы туулган М.Ф., башка өлкөнүн жараны кармалып, Бишкек ШИИББнын убактылуу кармоочу жайына киргизилген.
Ал эми 1978-жылы туулган Н.Т. 25-сентябрда кармалып, Бишкек ШИИББдин убактылуу кармоочу жайына киргизилген. Учурда тергөө амалдары жүрүп жатат.






















