5-ноябрда россиялык “Союз-2” ракета-алып жүрүүчү Ирандын эки спутнигин орбитага чыгарат.
Бул тууралуу Ислам Республикасынын Москвадагы элчиси Казем Жалали билдирди.
“Иран-Россия илимий-техникалык кызматташтыкты өнүктүрүүнү улантууда Ирандын эки спутниги “Коусар” жана “Хадхад” шейшемби күнү (5-ноябрда – ред.) Тегеран убактысы боюнча саат 2:48де «Союз» ракета-алып жүрүүчү менен жердин 500 километрдик орбитасына чыгарылат», – деп жазган ал X социалдык тармагына.
Жалали “Омид фаза” компаниясынын өкүлдөрү тарабынан иштелип чыккан жана курулган бул спутниктердин учурулушу менен Иран космос тармагынын жеке секторуна кириши үчүн чечкиндүү биринчи кадамды таштайт деген үмүтүн билдирди.
Октябрдын башында Тегеран орбитага 2025-жылдын март айынын аягына чейин өздүк өндүрүштөгү “Косвар”, “Толо-3” жана “Зафар-2” деп аталган үч аралыктан зонддоо спутниктерин учурары белгилүү болгон. Үч аппараттан турган система табигый кырсыктар учурунда, өзгөчө жер үстүндөгү инфраструктура иштебей турганда, чечимдерди кабыл алууну жеңилдетүү үчүн маалыматтарды кабыл алууга жана берүүгө мүмкүндүк берет.
Буга чейин 2024-жылдын 20-мартынан 2025-жылдын 20-мартына чейин созулган учурдагы календардык жылда Иран Парс-1 спутнигинин экинчи прототибин түзүүнү аяктап, Нахид-2 жана Саман-1ди учурууга даярдоону пландап жатканы маалымдалган.
«Союз» ракета-алып жүрүүчү Ирандын спутниги менен бирге буга чейин дагы учурулган. 2022-жылы Ирандын өтүнүчү менен Байконурдан “Хайям” спутниги орбитага чыгарылган.














