Беседин: Россия Индиядан 1 млн адисти тартат, ошондой эле Шри-Ланка жана Түндүк Корея менен да сүйлөшүүлөр жүрүп жатат
Россияга 1 миллион мигрант Индиядан алып келинет, анткени өлкөдө жогорку квалификациялуу кадрлар жетишсиз. Бул тууралуу ЕАН агенттигине Урал соода-өнөр жай палатасынын жетекчиси Андрей Беседин билдирди.
«Индиялык кесиптештеримден укканыма караганда, жыл аягына чейин Россияга, анын ичинде Свердлов облусуна Индиядан 1 миллион адис келет. Екатеринбург шаарында Индиянын жаңы Башкы консулдугу ачылып жатат, бул дипломатиялык өкүлчүлүк ушул маселелер менен алектенет», — деди Беседин.
Анын айтымында, өнөр жай ишканалары өндүрүш көлөмүн көбөйтүшү керек, бирок аймакта жумушчу күчү жетишсиз. Айрым жумушчулар Украинадагы аскердик операцияга катышууда, ал эми жаштар заводдорго барбай жатат, анткени мурда кетирилген идеологиялык ката алардын өндүрүштө иштөөсүнө тоскоол болууда.
Беседин кошумчалагандай, Шри-Ланка жана Түндүк Корея менен да ушул багытта иштер жүргүзүлүүдө, бирок бул өлкөлөр менен иштөө оңой болбой турганын белгиледи.
Россия мигранттар үчүн квотаны 1,5 эсеге көбөйттү
Россиянын Эмгек министрлиги 2030-жылга чейин өлкөдө кадр тартыштыгы 3,1 миллион адамга жетет деп божомолдогон. Министрлик 2025-жылы квалификациялуу чет элдик адистерге уруксат берүү квотасын 1,5 эсеге – 234,9 миң адамга чейин көбөйтүүнү сунуштаган. Маалыматка ылайык, 2024-жылы Россиянын өнөр жай ишканалары визалык өлкөлөрдөн 47 миң квалификациялуу мигрантты тарткан.
Индиялык жумушчулар 2024-жылдан тартып Россиянын аймактарында иштей башташкан, мисалы, Калининграддагы «За Родину» балык иштетүүчү комплекси аларды жумушка алган. Ошондой эле Yonhap жана The Wall Street Journal агенттиктери Түштүк Кореянын чалгын кызматына таянып, 2024-жылы Түндүк Кореядан миңдеген жумушчу Россияга жөнөтүлгөнүн билдиришкен. Росстаттын маалыматы боюнча, 2024-жылы Россияга 13 221 КЭДР жараны келген. 2023-жылы — 1 117, ал эми 2022-жылы — 223 болгон.
Бирок 2024-жылдын 22-мартында Москванын жанындагы «Крокус Сити Холл» концерттик залындагы теракттан кийин Россия бийлиги миграция мыйзамдарын катаалдаштырды. Мамдуманын төрагасы Вячеслав Володин билдиргендей, Төмөнкү палата миграцияга каршы 16 мыйзам кабыл алып, абалды «олуттуу өзгөрткөн».
Володин ошондой эле чет элдиктер үчүн иштөөгө уруксат берилген тармактардын тизмесин чектөө керектигин айтып, мындай деген:
«Тарбия, билим берүү жана саламаттык сактоо — бул биздин жарандар иштеши керек болгон тармактар».



















