Алдын ала маалымат боюнча, Өзбекстандын жарандары ичинде болгон минивэн жүк ташуучу машина менен кагылышкан.
11-январда саат 03:00 чамасында М-5 “Урал” федералдык автожолунун 504 чакырымында, Пенза облусунун Нижнеломов районунун Фёдоровка селосунун аймагында Volvo жүк ташуучу машинасы менен JAC кичиавтобусу кагылышкан. Бул тууралуу Россия ИИМнин Пенза облусу боюнча жол коопсуздугу кызматы билдирди.
Алдын ала маалыматка ылайык, кичиавтобустун 1981-жылы туулган айдоочусу каршы тилкедеги жолго чыгып кетип, рулунда 1991-жылы туулган айдоочусу отурган жүк ташуучу машина менен сүзүшкөн.
Жол кырсыгынын кесепетинен минивэндин ичиндеги жети адам ошол жерде каза болгон. Дагы бир жабырлануучу медициналык тез жардам машинасында кайтыш болгон, дагы бир жүргүнчү оор абалда ооруканага жеткирилген.
Каза болгон жарандардын баардыгы Өзбекстандын атуулдары экендиги маалымдалууда.



















