РФнын президенти Владимир Путин жана КЭР төрагасы Си Цзиньпин эки өлкөнүн ортосундагы стратегиялык өнөктөштүктү талкуулашат.
Россиянын президенти Владимир Путин Кытай Эл Республикасынын төрагасы Си Цзиньпиннин чакыруусу менен 19–20-май күндөрү Кытайга расмий сапар менен барат.
Кремлдин басма сөз кызматы билдиргендей, бул сапар мамлекеттер аралык байланыштар үчүн негиз болуп саналган коңшулук, достук жана кызматташтык тууралуу келишимге кол коюлганына 25 жыл толушуна арналган.
Маалыматка ылайык, Владимир Путин менен Си Цзиньпин эки тараптуу мамилелердин актуалдуу маселелерин, ар тараптуу өнөктөштүктү жана стратегиялык кызматташууну мындан ары тереңдетүү жолдорун талкуулашат. Ошондой эле эл аралык жана аймактык негизги маселелер боюнча пикир алмашышат.
Мамлекет башчылары 2026–2027-жылдарга карата Россия менен Кытайдын билим берүү жылдарынын ачылыш аземине да катышат.
Сүйлөшүүлөрдүн жыйынтыгында жогорку деңгээлдеги биргелешкен билдирүүгө, ошондой эле эки тараптуу өкмөттөр аралык, ведомстволор аралык жана башка документтерге кол коюу пландалууда.
Мындан тышкары, сапардын программасында Кытайдын Мамлекеттик кеңешинин премьер-министри Ли Цян менен жолугушуу каралган. Анда соода-экономикалык кызматташтыктын келечеги талкууланат.
