Иран Ислам Республикасынын шайланган президенти Масуд Пезешкян Россиянын лидери Владимир Путинден Казанда өтө турган БРИКС саммитине чакыруу алды.
Муну Ислам республикасынын Тышкы иштер министрлигинин басма сөз катчысы Насер Канани ырастад.
“Путинден Пезешкяндын БРИКС саммитине катышуусу үчүн расмий чакыруу алдык”, – деди Канани.
Ошол эле учурда ал Пезешкяндын саммитке катышаар-катышпасын тактаган жок.
29-июлда РФ президентинин басма сөз катчысы Дмитрий Песков Путин БРИКС саммитинде Пезешкян менен жолугушууга даярданып жатканын «Известия» гезитине берген комментарийинде билдирген. Ал Иран тарапка чакыруу жөнөтүлгөнүн кошумчалаган.
2024-жылдын 1-январынан тарта БРИКСке төрагалык кылуу Россияга өткөн. Ал жылдын аягына чейин созулат жана кеңири темадагы 200дөн ашык иш-чараны камтыйт. Россиянын төрагалыгы учурундагы негизги окуя октябрда Казанда өтө турган БРИКСтин саммити болмокчу.
Эске салсак, 2023-жылдын 22-24-августунда Йоханнесбургда Түштүк Африканын төрагалыгы алдында өткөн саммитте БРИКСке мүчө өлкөлөрдүн башчылары уюмдун кеңейиши боюнча декларация кабыл алышкан. Ошол кезде анын курамына Бразилия, Россия, Индия, Кытай жана Түштүк Африка кирген.
2024-жылдын 1-январында Иран, Египет, Эфиопия, Сауд Арабиясы жана БАЭ ассоциациянын толук кандуу мүчөсү болушкан.


















