АКШнын коргоо министри Пит Хегсет жогорку даражадагы жыйырмага жакын америкалык офицерди кызматтан алды, алардын ичинде АКШ армиясынын штаб башчысы генерал Рэнди Джордж да бар. Бул тууралуу The Washington Post басылмасы жазды.
Масштабдуу кадрдык «тазалоо» Иран менен согуш жана мүмкүн болгон жер үстүндөгү операцияга даярдык фонунда өтүүдө — 82-аба-десанттык дивизиясынын бөлүктөрү Жакынкы Чыгышка жайгаштырылды. Бирок мындай операцияны бардык аскерлер жана эксперттер колдой бербейт. Мисалы, америкалык Blackwater жеке аскердик компаниясынын негиздөөчүсү Эрик Принс Ирандагы жер үстүндөгү операцияга каршы чыгып, аны кооптуу деп атаган.
61 жаштагы Рэнди Джордж — кесипкөй аскер жана Ирак менен Афганистандагы согуштардын ардагери. Ал кызматтан кетиши мүмкүн болгон негизги талапкерлердин бири катары каралып келген. 2023-жылы штаб башчысы болуп дайындалганга чейин ал мурдагы коргоо министри Ллойд Остиндин улук жардамчысы болуп иштеген. Ошого карабастан, Джордж узак убакыт бою кызмат ордун сактап келген.
Анын менен кошо дагы эки генерал кызматтан алынган: армияны даярдоо жана трансформациялоо командасынын башчысы Дэвид Ходн жана башкы армиялык капеллан Уильям Грин-кичүү. The Washington Post маалыматына караганда, Хегсет дагы бир катар жогорку даражадагы офицерлердин кызматка көтөрүлүшүн токтоткон же аларды кызматтан алган. Акыркы жылдары ал аскер капелландарынын ишине болгон мамилени өзгөртүүгө аракет кылып, армиядагы христиан дининин маанисин баса белгилеп келген.
Ошондой эле Хегсет Пентагондун негизги кеңеш берүүчү органы болгон Бириккен штаб башчылары комитетин да кайра түздү. Мурдагы курамдан өз ордунда деңиз пехотасынын командачысы Эрик Смит жана Космос күчтөрүнүн башчысы Б. Ченс Зальцман гана калды. Өткөн жылдын башында эле Трамптын командасы комитеттин төрагасы Чарльз Браун-кичүүнү, деңиз күчтөрүнүн башчысы Лиза Франкеттини, жээк күзөтүнүн командачысы Линда Фейганды жана аба күчтөрүнүн штаб башчысынын орун басары Жеймс Слайфты кызматтан алган. Хегсет аба күчтөрүнүн штаб башчысы Дэвид Олвиндин да мөөнөтүнөн мурда кетишин талап кылган.
The Washington Post белгилегендей, Хегсет аскер жетекчилигин Дональд Трампка жетиштүү деңгээлде берилген эмес деп көптөн бери сынга алып келген. Ошондой эле жаңы администрациянын саясатынын таасири байкалууда — кызматтан алынгандардын арасында аялдар жана азчылык өкүлдөрү салыштырмалуу көбүрөөк.
«Эпикалык каар» аттуу аскердик операция беш жумадан бери уланып жатат, бирок Трампка болгон басым күчөп жатат. Себеби бул кампания АКШга күн сайын миллиарддаган доллар чыгым алып келүүдө, күйүүчү майдын баасынын өсүшүнө себеп болду жана коомчулук арасында популярдуу эмес — анын башталышынан кийин президенттин рейтинги тарыхый эң төмөн деңгээлге түшкөн. Ирандагы бийлик өзгөргөн жок жана Перс булуңу менен Израилдеги объектилерге сокку уруу мүмкүнчүлүгүн сактап калды.
АКШ чалгын кызматынын маалыматына ылайык, Ирандын ракеталык түзүлүштөрүнүн болжол менен жарымы сакталып калган, ал эми арсеналында миңдеген сокку уруучу дрондор бар. «Алар дагы деле аймак боюнча башаламандык жаратууга даяр», — деди булактардын бири. The Times жазгандай, Иран Перс булуңундагы өлкөлөрдө жайгашкан АКШнын 13 аскер базасынын көпчүлүгүнө «олуттуу» зыян келтирген. Согуштун биринчи айынан кийинки зыян дээрлик 1,5 миллиард долларды түзгөн, кеминде 300 америкалык аскер кызматкери жаракат алган. Ошондой эле АКШ кеминде он аскердик учагын жана ондогон дрондорун жоготкон.

















