Армениянын премьер-министри Никол Пашинян бир катар жагдайлардан улам Кыргызстанда өтө турган КМШнын Мамлекет башчыларынын Кеңешинин жыйынына катыша албай турганын өкүнүч менен билдирди.
Бул тууралуу ал президент Садыр Жапаров менен болгон телефондогу сүйлөшүүсүндө билдирди.
Президенттин маалымат кызматынан билдиришкендей, сүйлөшүү армян тараптын демилгеси менен жүргүзүлүп, анда эки тараптуу күн тартибиндеги актуалдуу маселелер, анын ичинде ушул жылдын 13-октябрында Бишкекте өтө турган Көз карандысыз Мамлекеттер Шериктештигинин Мамлекет башчыларынын Кеңешинин жыйыны талкууланды.
Лидерлер туруктуу байланыштарды сактоого жана эки өлкөнүн элдеринин жыргалчылыгы үчүн достук маанайда эки тараптуу мамилелерди бекемдөөгө макулдашты.
Белгилей кетсек, 13-октябрда Бишкек шаарында президент Садыр Жапаровдун төрагалыгы алдында Көз карандысыз Мамлекеттер Шериктештигинин Мамлекет башчыларынын кеңешинин жыйыны өтөт. Бул саммитке Шериктештиктин мамлекет башчыларынын катышуусу күтүлүүдө.
Россия президенти Владимир Путиндин өлкөгө расмий сапары 12-октябрда болорун буга чейин президенттин администрациясынын тышкы саясат бөлүмүнүн башчысы Муратбек Азымбакиев билдирген.



















