Бүгүн, 13-июндагы Жогорку Кеңештин жыйынында өлкө аймагында уран жана торий кендери чыккан жерлерди издөө, чалгындоо жана иштетүүгө уруксат берген мыйзам долбоору экинчи жана үчүнчү окууда кабыл алынганын парламенттин коомчулук жана ЖМК менен иштөө бөлүмү билдирди.
Документке 70 депутат “макул”, сегиз депутат “каршы” добуш берди.
Жыйында Министрлер кабинетинин төрагасы Акылбек Жапаров мыйзам долбоору уран жана торий кендерин эмес, титаномагнетит кендерин иштетүүгө багытталганын баса белгиледи.
Мыйзам долбоору 2019-жылы кабыл алынган “Кыргыз Республикасында уран, торий кендерин издөө, чалгындоо жана иштетүү максатында жер казынасын геологиялык изилдөө менен байланышкан ишке тыюу салуу жөнүндө” мыйзамын жокко чыгаруу максатын көздөйт.
Эске салсак, президент Садыр Жапаров 19-февралда Балыкчы шаарында Ысык-Көлдүн Тоң районунун жана Нарын облусунун Кочкор районунун тургундары менен жолугушуп, Кызыл-Омпол кенин мамлекет өз күчү менен экологияга зыян келтирбей иштетүүнү пландап жатканын айткан. Мамлекет башчы кен иштей баштаса, миңден ашуун жумушчу оруну түзүлөрүн билдирген.



















